ЭБУ ТАЛИБ ВЕ ХАЗРЕТИ ХАТИДЖЕНИНЪ ВЕФАТ ЭТМЕЛЕРИ

 Бойкотнынъ битмесинен Пейгъамберимиз -саллаллаху алейхи ве селлем- ве мусульманлар бираз раат нефес алдылар. Факъат арадан чокъ вакъыт кечмеден Пейгъамберимиз -саллаллаху алейхи ве селлем-нинъ эмджеси Эбу Талиб, бир къач кунь сонъра да ханымы Хазрети Хатидже вефат эттилер.

Эбу Талиб, Пейгъамберимиз-саллаллаху алейхи ве селлем-ни озь эвляды киби север ве къорчалар эди. Хазрети Хатидже исе Пейгъамберимиз -саллаллаху алейхи ве селлем-ге энъ биринджи инанды, энъ агъыр вакъытларда онъа къол туткъан, ярдымджы олгъан садыкъ ве вефакяр бир къадын эди. Пейгъамберимиз -саллаллаху алейхи ве селлем-, озюне эр вакъыт къол туткъан бу эки къыйметли инсанны гъайып этмектен чокъ кедерленди. Бу себептен бу йылгъа «кедер йылы» деген ад берильди.

Эбу Талиб ве Хазрети Хатидженинъ олюминден сонъра мушриклер, Пейгъамберимиз -саллаллаху алейхи ве селлем-ге япкъан эзиетлерини даа зияделештирдилер. Бир кунь сокъакътан кечкенде алчакъ бириси Пейгъамберимиз -саллаллаху алейхи ве селлем-нинъ башына топракъ атты. Пейгъамберимиз -саллаллаху алейхи ве селлем- о алынен эвине кельди. Къызы Хазрети Фатима бабасыны бу алда корип ынджынды ве узерине атылгъан топракъларны темизлеркен, агълады. Къызынынъ агълагъаныны корьген Пейгъамберимиз -саллаллаху алейхи ве селлем-: «Агълама яврум, Юдже Аллах бабанъы къорчалайджакъ», - деп Аллахкъа олгъан инамыны ифаде этти