МЕСТЛЕР УЗЕРИНЕ МЕСХ ЭТМЕК

 Абдест алгъандан сонъра аякъларына мест кийген адам текрар абдест алгъанда местлерини чыкъармайып, устлеринден месх этмеси етерлидир. Бу, динимизнинъ мусульманларгъа косьтерген бир къолайлыкътыр.

Ёлджу олмагъанлар 24 саат боюнджа эр абдест алувда местлер узерине месх этерлер. 24 саат кечкенинен абдест алгъанда кене аякъларнынъ ювулмасы керек. Динимизге коре мусафир сайылгъанлар ичюн бу вакъыт учь кунь, учь гедже, яни 72 саат.

1. Местлер узерине шойле месх этилир 

Юкъарыда тариф этильгени шекильде абдест алынаяткъанда сыра аякъларгъа келир экен; башта сагъ элини сылатып, учь пармагъынен (пармакълар ачыкъ оларакъ) сагъ аягъынынъ уджундан топукъларнынъ устюне къадар местнинъ узеринден бир кере сийпалыр. Сонъра сол эль сылатыларакъ сол аякъ да бойле месх этилир. Местлернинъ тюбю месх этильмез.

 2. Месхнинъ джаиз (мумкюн) олмасынынъ шартлары 

Местлер узерине месхнинъ джаиз олмасы ичюн шу шартларнынъ булунмасы лязим:

а. Местлер абдестли (яни аякълар ювулгъаны алда) кийильген олмалы.

б. Местлер аякъларны топукъларгъа къадар къапаткъан олмалы. Топукълардан къыскъа олгъан местлер узерине месх этильмез.

в. Местлер къавий олмалы. Бунынъ ичюн, 6 километр юрюмеге чыдамлы я да аякътан чыкъарылгъанда озь башына тик тура биледжек  киби шартлар къавий олманынъ ольчюси оларакъ зикир этиле. Шуны къайд этмели ки, териден япылгъан местлер бу шарткъа уйгъундыр.

г. Эр бир местте аякъ пармакъларынынъ учь данеси сыгъаджакъ къадар тешик, йыртыкъ я да сёкюльген ер олмамалы.

д. Местлер сувны аякъкъа кечирмемели.

3. Месхни бозгъан шейлер 

а. Абдестни бозгъан эр шей. Бойлеликнен, абдестни бозгъан бир ал мейдангъа кельсе, янъыдан абдест алгъанда местлер узерине месх этмек лязим.

б. Местлернинъ аякътан чыкъмасы я да чыкъарылмасы. Бу алда, эгер киши абдестли олса, тек аякъларыны ювар. Местлерден бириси чыкъса биле эки аякъны да ювмакъ керек. Эгер де мест чыкъкъанда киши абдестли дегиль исе, абдест алып аякъларыны да ювар.

 в. Мест муддетининъ битюви.
Мест муддети биткен вакъыт эгер кишининъ абдести бар исе, местлерни чикъарып тек аякъларыны ювмасы етерлидир. Абдести ёкъ исе, янъыдан абдест алгъанда аякъларыны да ювар.