Хазрети Хамзанынъ мусульман олмасы ве мусульманларнынъ куньден куньге къуветленмеси Къурейш мушриклерини теляшландыра эди. Бу алгъа бир чаре тапмакъ ичюн «Дару’н- Недве» дейильген ерде топландылар. Меккеде мейдангъа кельген вазиетни козьден кечирдилер ве Эбу Джахильнинъ теклифи узерине Хазрети Мухаммед -саллаллаху алейхи ве селлем-ни ольдюрмеге къарар бердилер. Бу къоркъунчлы къарарны ерине кетирмекни ичлеринде энъ джесюр олгъан Умерге тапшырдылар. О вакъыт отуз учь яшында олгъан Умер, къылычыны къушанды. Ве Хазрети Мухаммед -саллаллаху алейхи ве селлем-ни ольдюрмек ичюнь ёлгъа чыкъты.
Мусульманлар, Эркамнынъ эвинде топландылар. Пейгъамберимиз -саллаллаху алейхи ве селлем-де анда эди. Умер ёлда Нуаймгъа раст кельди. Нуайм: «Къайда кетесинъ, я Умер?» деп сорады. Умер:
- Миллетни бозгъан Мухаммедни ольдюрмеге кетем, - джевабыны берди. Нуайм онъа:
- Къыйын бир ишке кириштинъ, - деп айткъанында‚ Умер онъа:
- Сен де Мухаммеднинъ тарафына кечтинъми?-деп ачувлангъан алда сорады. Нуайм:
- Я Умер, сен манъа тийме, озь къорантанъа бакъ, эништенъ Саид ве къыз къардашынъ Фатима мусульман олдылар, - деген сонъ Умер:
- Башта оларнынъ ишини битирейим, -деп ёлуны денъиштирип къыз къардашынынъ къапысыны чалды. О сырада къыз къардашы иле эништеси, Пейгъамберимиз -саллаллаху алейхи ве селлем-ге янъы назиль олгъан «Та-Ха» суресиндеки аетлерни окъуй эдилер. Умернинъ силялы кельгенинден къоркъып, Къуран саифелерини сакъладылар.
Умер эвнинъ ичине кирген сонъ, не окъугъанларыны сорады. Олар да: « Бир шей ёкъ», - дедилер. Умер даа да ачувланды: « Демек эшиттиклерим догъру экен», - деп эништесининъ якъасындан тутып, ерге итерди ве урмагъа башлады. Къоджасыны къуртармагъа истеген къыз къардашы Фатимеге де бир шамар урды. Заваллы къадын агъзындан, бурнундан къанлар акъкъан алда ерге юварланды. Фатима, иманынынъ берген джесаретинен Умерге шу сёзлерни айтты:
- Аллахтан къоркъ. Бир къадынгъа япкъанларынъа бакъ. Мен ве къоджам мусульман олдыкъ. Башымызны кессенъде бу ёлдан къайтмайджакъмыз.
Бу сёзлерден сонъра Умер бир аз йымшады ве:
- Окъугъанынъыз шейни манъа кетиринъ, - деди. Къыз къардашы окъугъанлары саифелерни чыкъарып берди. Умер дикъкъатнен окъумагъа, окъугъан сайын къальби йымшамагъа башлады. Къуран-ы Керимнинъ бенъзери олмагъан аэнки, манасындаки юксеклик, окъунмасындаки лезет ве гузеллик Умернинъ къальбини фетх этти. Энди Умернинъ къальби Ислямгъа ачылгъан эди. Хазрети Мухаммед -саллаллаху алейхи ве селлем-нинъ янына кете. Онынъ огюнде келиме-и шехадет кетирип, мусульман ола. Анда олгъанлар бунъа чокъ севиндилер. Эп бирликте келиме-и шехадет кетирдилер.
Умернинъ Ислямгъа кирмесинен мусульманлыкъ къуветленди. Умер:
- Къач адамсынъыз?- деп сорады.
- Сеннен къыркъ адам олдыкъ, - дедилер.
Умернинъ истегине коре, огьде Пейгъамберимиз -саллаллаху алейхи ве селлем-нинъ олгъаны алда мусульманларнынъ эписи Кябеге кетелер. Анда джемаатнен ачыкъта намаз къылалар. Мушриклер исе, Пейгъамбер -саллаллаху алейхи ве селлем-ни ольдюрмеге ёллагъанлары Умернинъ мусульман олгъаныны эшиткенлеринде шашып къалдылар. Пейгъамберимиз -саллаллаху алейхи ве селлем-ни ольдюрмек ичюнь ёлгъа чыкъкъан Умернинъ, мерхаметсиз ве таштан даа да къатты къальбини къыз къардашынынъ эвинде окъулгъан Къуран аетлери йымшатты, къаранлыкъ гонъюлини нурнен толдурды. Пейгъамбер -саллаллаху алейхи ве селлем-ге душманлыкъ беслеген Умер шимди онынъ досту олды.
Комментариев нет:
Отправить комментарий