Акърабаларымызгъа нисбетен вазифелеримиз

Къуранда Аллах шойле буюра:

«Аллахкъа ибадет этинъиз ве Онъа ич бир шейни ортакъ къошманъыз. Ана-бабагъа, акърабагъа, етимлерге, ёкъсулларгъа, якъын къомшугъа, узакъ къомшугъа, якъын аркъадашкъа, ёлджугъа, эллеринъиз алтында олгъанларгъа (къул, джарие, хызметчи ве оларгъа бенъзегенлерге) яхшы мунасебетте олунъыз; Аллах, озюни бегенген ве даима макътанып тургъан кимсени севмез».Ниса суреси 36

Акърабалар кениш манада къорантамызнынъ бир парчасы олгъаны ичюн оларгъа нисбетен япмамыз керек олгъан ахлякъий вазифелеримиз бар.

 1. Акърабаларымызгъа севги ве урьмет косьтермек. 

Пейгъамберимиз шойле буюра:

 «Аллахкъа ве ахырет кунюне инангъан, акърабаларына яхшылыкъ этсин…». Бухари.

 2. Ихтияджы олгъанларгъа ярдым этмек.

Севгили Пейгъамберимиз Хазрети Мухаммед буюра:

«Эй инсанлар! Бири-биринъизге селям беринъиз! Акъраба багъларынъызны узьменъиз! Бири-биринъизге икрам этинъиз! Башкъалары юкълагъанда, гедже намаз къылынъыз, ве селяметликнен Дженнетке кирерсинъиз». Тирмизи.

3. Оларны унутмамакъ, базы вакъытларда оларны зиярет этмек, бахшыш бермек.

 Севгили Пейгъамберимиз Хазрети Мухаммед буюра: «Акърабаларынен багъыны кескен киши дженнетке кирип оламаз». Бухари.
 Бир башкъа хадисте Пейгъамберимиз: «Шубесиз Адем огълунынъ амеллери Аллахкъа джумаакъшамындан джумагъа кечкен гедже бильдириле; ве акъраба багъларыны узьгенлернинъ амеллери къабул этильмейджек». Ахмед б. Ханбель.

4. Узакъта олгъанларгъа мектюп язып, телефон ачып, бойлеликнен къоранта багъларыны къуветлендирмек.

Севгили Пейгъамберимиз Хазрети Мухаммед -саллаллаху алейхи ве селлем- буюра: «Рызкъынынъ арткъаныны ве омрюнинъ узун олгъаныны истеген акъраба багъларыны узьмесин». Бухари.

 Тизе, ала, дайы ве эмдже бизим ана ве бабаларымыз кибидир.
 Оларгъа ана ве бабамыз киби севги ве урьмет косьтермек керекмиз.

Сахабелерден Абдуллах б. Эби Эвфа шойле дей:
Биз Пейгъамберимизнинъ янында эдик. Пейгъамберимиз -саллаллаху алейхи ве селлем-: «Къардашларынен багъыны узьген бугунь бизнен отурмасын», - деп айтты. Бунынъ узерине, тизесинен арасында джан агъырысы олып кечкен бир генч арамыздан турып, тизесине кетти. Онынънен корюшип, мабетлешти. Сонъ да о генч кене меджлисимизге кельди. Бунынъ узерине Пейгъамберимиз -саллаллаху алейхи ве селлем-: «Эгер бир топлумда къардашынен багъыны узьген кимселер бар олса, о топлумгъа рахмет энмез» буюрды