Балаларнынъ ана ве бабаларына нисбетен вазифелери

 Къуран-ы Керимде Аллах шойле буюра:
«Раббинъ, ялынъыз онъа къуллукъ этменъизни, анабабанъызгъа да яхшы мунасебетте олманъызны кесен-кес бир шекильде эмир этти. Олардан бири я да эр экиси сенинъ янынъда къартайсалар, оларгъа «Уф!» биле деме; оларны азарлама; экисине де гузель сёз сёйле. Оларгъа мерхамет этерек, алчакъгонъюллиликнен узерлерине къанат кер ве «Раббим! Кучюклигимде олар мени насыл етиштирген олсалар, шимди сен оларгъа (ойле) рахмет эйле!»- деп дуа эт».Исра суреси, 23-24.

 1. Ана ве бабагъа яхшылыкъ япмакъ. 
Пейгъамберимиз -саллаллаху алейхи ве селлем- буюрды ки: «Аллахнынъ разылыгъы ана-бабанынъ разылыгъынен, Аллахнынъ ачувланмасы да ана-бабанынъ ачувланмасынендир».Тирмизи.

 Бир башкъа хадисте Пейгъамберимиз: «Ич бир эвлят бабасынынъ хакъкъыны одеп оламаз. Эгер бабасы къул олса ве бабасыны къуллукътан азат этсе, о вакъытта бабасынынъ хакъкъыны одеген олур». Муслим.

2. Яшайышлары къыйын олса оларгъа ярдым этмек, оларны мухтадж вазиетте ташламамакъ. Пейгъамберимиз шойле буюрды: «Дженнет аналарнынъ аякълары астындадыр».

 3. Ана ве бабаны лаф ве арекетлернен ич бир шекильде ынджытмамакъ, «уф» биле демемек.
Пейгъамберимиз Хазрети Мухаммед -саллаллаху алейхи ве селлем-шойле буюрды: «Бурну ерде сюрюнсин, бурну ерде сюрюнсин, бурну ерде сюрюнсин». Ондан сорайлар:
- Кимнинъ бурну сюрюнсин, я Ресулюллах? 
Пейгъамберимиз: - Ана-бабасы къартланып да я да экисинден бириси къартланып да, оларнынъ разылыгъыны къазанамайып Дженнетке киремеген адамнынъ», - деп буюрды. Муслим.

4. Ана ве бабаларына нисбетен кулер юзлю, татлы сёзлю олмакъ, юзлерине серт ве ачувнен бакъмамакъ.
Пейгъамберимз шойле буюрды: «Аллах къатында энъ севимли амель, вакътында къылынгъан намаз ве ана-бабагъа яхшы мунасебетте олмакъ».Бухари.

 5. Чагъыргъанлары вакъыт аман кельмек. 

6. Ана ве бабаларнынъ эмирлерини динълемек ве япмакъ (эгер бу эмирлерде динимизге терс кельген бир шей олмаса). 

7. Эр иште оларны разы этмек 
Пейгъамберимиз шойле буюрды: «- Гуняхларнынъ энъ буюги ана-бабаны сёгмектир. Пейгъамберимизден сорайлар: 
- Бир киши ана-бабасыны сёгерми? 
Пейгъамберимиз деди ки: 
- Эльбет, эгер бириси бирисининъ бабасыны сёгсе, о да онынъ бабасыны сёгер, ве бириси бирисининъ анасыны сёгсе, о да онынъ анасыны сёгер». Муслим.

 8. Янларында юксек сеснен лаф этмемек.

 9. Ана-баба хызметке мухтадж олсалар, оларгъа хызмет этмек ве буны севе-севе япмакъ. 

10. Ёлда кеткенде оглерине кечмемек.

 11. Олардан разылыкъ алмайып бир ерге кетмемек.

 12. Ольгенлери вакъыт оларны рахметнен анъмакъ, дуа этмек, оларнынъ рухлары ичюн хайыр япмакъ, васиетлерини ерине кетирмек, ана ве бабанынъ достларына яхшылыкъ япмакъ, ана ве бабагъа ярамай лаф сёйленмесине себепчи олмамакъ.
Ана-баба хакълары мевзусында Пейгъамбер Эфендимиз -саллаллаху алейхи ве селлем- шойле буюра:
 «Аллахнынъ къыямет кунюнде юзлерине бакъмайджакъ кимселерден бириси де - анасына, бабасына къаршы кельгенлердир».Эт-Тергъиб вет-Терхиб, дж.3, с.327.

 «Аллах бутюн гуняхлардан тилегенининъ (джезасыны) къыямет кунюне къалдырыр, ялынъыз ана-бабагъа къаршы кельгеннинъ джезасыны Аллах, саибине ольмеден эвель береджек». Сечме Хадислер, с.58