Пейгъамберимиз Хазрети Мухаммед -саллаллаху алейхи ве селлем-, Аллах тарафындан пейгъамбер оларакъ ёлланылгъаныны исбат этмек макъсадынен бир чокъ муджизелер косьтерген.
Муджизелерден базылары шулар:
1. Куньлерден бир кунь экинди намазы якълашкъан эди, факъат пейгъамберимиз абдест ичюн сув тапамады. Сонъра пейгъамберимизге бир леген кетирдилер. Ичинде азачыкъ сув бар эди. Пейгъамбер эфендимиз элини шу легеннинъ ичиндеки сувгъа сокъты ве пармакъларынынъ арасындан сув фышкъырмагъа башлады. О ерде олгъан учь юз къадар джемаат бу сувдан абдест алгъандже бойле девам этти.
2. Пейгъамбер эфендимиз, Мединедеки месджитте бир хурма кутюги устюне чыкъып джемааткъа хитап эте эди. Мусульманлар чокълашкъанынен, Пейгъамберимиз даа юксек бир ерден къонушмакъ ичюн учь басамакълы бир минбер яптырды. Бир джума куню хутбени бу минберден окъумагъа башлагъанда, месджиднинъ обир тарафындан, хурма кутюги тургъан ерден бир сес эшитильди. Шу кутюк, пейгъамберимизден айыры къалгъаны ичюн яврусындан айырылгъан девенинъ сесине бенъзеген бир сеснен инълемеге башлады. Буны корьген пейгъамберимиз минберден тюшти ве кутюкнинъ янына барып оны къучакълады, сыйпады ве кутюкнинъ инълемеси токътады.
3. Пейгъамберимиз хиджреттен бир ярым йыл эвель бир гедже Буракъ ады берильген бир васта иле Меккедеки Месджид-и Харамдан Къудустеки Месджид-и Акъсагъа кетирильди ве андан Джебраиль -алейхисселям-нен берабер коклерге юксельди. Еди къат кокнинъ де юкъарысына кечип Аллахнен корюшти. Аллахнынъ даветлиси оларакъ пейгъамберимизнинъ япкъаны бу ёлджулыкъ кяинатта бенъзери корюльмеген бир адиседир ве пек къыскъа вакъытта керчеклешкендир. Аллахнынъ сонъсуз къудретининъ эсери олгъан бу вакъиа, пейгъамберимизнинъ «Исра ве Мирадж» муджизесидир.
4. Пейгъамберимизнинъ энъ буюк ве даимий муджизеси Къуран-ы Керимдир. Рухларны къанатландыргъан, гонъюллерге сакинлик берген окъунышы, сайысыз икметлернен толу юксек манасы, инсанларнынъ бахтлы олувы ичюн кетирген эбедий принциплери ве бутюн девирлерни айдынлаткъан ильмий акъикъатларынен Къуран-ы Керим эшсиз бир муджизедир.
Комментариев нет:
Отправить комментарий