Къомшуларгъа нисбетен вазифелеримиз

Акърабаларымыздан сонъ бизге энъ якъын олгъан инсанлар къомшуларымыздыр. Эр кунь къаршылашкъан, чокъ вакъыт берабер олгъан къомшуларымызнен яхшы кечинмек динимизнинъ эмридир.

Юдже Аллах Къуръан-ы Керимде къомшуларгъа яхшылыкъ япмамызны эмир эте, севгили Пейгъамберимиз де:

«Аллахкъа ве ахырет кунюне инангъан, къомшусына яхшылыкъ этсин…». (Муслим)

«Аллахкъа ве ахырет кунюне инангъан къомшусыны раатсыз этмесин...», - деп буюра. (Бухари)

Пейгъамберимиз -саллаллаху алейхи ве селлем- бир хадис-и шерифинде де къомшусына ярамазлыкъ япкъанларнынъ керчек мумин оламайджакъларыны ве дженнетке киремейджеклерини бильдире.

Севгили Пейгъамберимиз Хазрети Мухаммед -саллаллаху алейхи ве селлем- кене бир башкъа хадисинде шойле буюра: «Къомшусы ач олып, озю токъ яткъан бизден дегиль». (Хайсеми, Меджмауззеваид)

Къомшуларымызгъа нисбетен энъ биринджи вазифелеримиз шулар:

1. Къомшуларнынъ хакъкъына сайгъылы олмакъ, оларны сёз ве арекетлеримизнен ынджытмамакъ. 

Севгили Пейгъамберимиз Хазрети Мухаммед -саллаллаху алейхи ве селлем- шойле буюра: «Джебраиль манъа къомшулар акъкъында о къадар насиат этти ки, мен къомшу манъа мирасчы оладжакъ деп белледим». (Бухари)

2. Кулер юзлю, татлы сёзлю олмакъ, севинч ве кедерлерини пайлашмакъ. 

3. Дерт ве къасеветлерини эксильтмеге тырышмакъ, керек олгъанда ярдым этмек, бордж бермек, бири-бирлерине бахшыш бермек.

 Севгили Пейгъамберимиз Хазрети Мухаммед -саллаллаху алейхи ве селлем- шойле буюра: «Бир адам бир муминнинъ дюнья къасеветлеринден бирини кеткизсе, Аллах да къыямет куню о муминнинъ къасеветлеринден бирини кеткизер». (Муслим)

4. Сеснен ве шаматанен (гурюльтинен) оларны раатсыз этмемек.

Севгили Пейгъамберимиз Хазрети Мухаммед -саллаллаху алейхи ве селлем- шойле буюра: «Аллахкъа ве ахырет кунюне инангъан къомшусына зарар бермесин». (Бухари)

5. Хасталангъаны вакъыт зиярет этмек, вефат эткенде дженазесине къатылмакъ, тазие бильдирмек.

Севгили Пейгъамберимиз Хазрети Мухаммед -саллаллаху алейхи ве селлем- шойле буюра: «Аллах къатында энъ яхшы дост - достуна яхшы мунасебетте олгъан адам, энъ яхшы къомшу исе - къомшусына яхшы мунасебетте олгъан адам». (Тирмизи)

 6. Эгер кенди эвини сатаджакъ олса, эвеля къомшуларгъа теклиф этмек. 

Къыскъасы:

Озюмиз ичюн севген шейлерни олар ичюн де севип истемек, озюмизге япылмасыны истемедигимиз шейлерни оларгъа япмамакъ керек.

 Къомшумыз мусульман олмаса биле, оларнен яхшы кечинмек, оларгъа яманлыкъ япмакътан сакъынмакъ, яхшы арекетлер япмакъ вазифемиз.

Динимизнинъ эмри бу. Бу эмирге уйгъун оларакъ мусульманлар, тарих боюнджа мусульман олмагъан къомшуларгъа нисбетен яхшылыкъ япкъанлар.

Хазрети Умернинъ огълу Абдуллах бир кунь хызметчисине къой сойдурып, этинден бир къысмыны къомшуларгъа дагъытмасыны ве эвеля мусульман олмагъан къомшудан башламасыны эмир эте ве бу сёзюни учь кере текрарлай. (Алийюль-Къари Шерху Айнуль-ильм, дж.1, с.291)