ХАЗРЕТИ МУХАММЕДНИНЪ -саллаллаху алейхи ве селлемХАЗРЕТИ ХАТИДЖЕ ИЛЕ ЭВЛЕНМЕСИ ВЕ БАЛАЛАРЫ

Шам сеферинден къайткъандан сонъра Пейгъамберимиз, Къурейш къабилесининъ асылзаде ве зенгин къадыны Хатидже иле эвлене. Хазрети Мухаммед -саллаллаху алейхи ве селлем- о вакъыт 25  яшында эди. Хатидже исе 40 яшына кельген эди. Бахтлы бир аиле ювасы къурула.
Хазрети Мухаммед -саллаллаху алейхи ве селлем-нинъ учь огълан, дёрт къыз олмакъ узере еди баласы дюньягъа кельди. Булардан алтысы Хазрети Хатиджеден, бири Мариеден догъгъан эди. Огъланлары Къасым, Абдуллах ве Ибрахимдир. Къызлары Зейнеб, Рукъие, Умму Кульсум ве Фатимадыр. Къасымнен Абдуллах, Пейгъамберимиз -саллаллаху алейхи ве селлем-ге пейгъамберлик кельмеден эвель, кучюк яшта олгъанларында Меккеде вефат эттилер. Ибрахим исе хиджреттен сонъра Мединеде догъды ве кучюк яшта анда вефат этти. Къызларынынъ эписи осьти ве эвлендилер. Хазрети Фатимадан башкъа учь къызы Пейгъамберимиз -саллаллаху алейхи ве селлем-ден эвель вефат эттилер.

Пейгъамберимиз -саллаллаху алейхи ве селлем-нинъ несили Хазрети Алинен эвленген Хазрети Фатиманынъ эвлятларынен девам этти.