Бала дюньягъа теp-темиз олып келе. Эгер бала ана-баба тарафындан яхшы тербие этилип, гузель табиатларнен сюсленсе, гузель ахлякълы оларакъ етише. Эгер онъа яхшы тербие бермейип, рухуны ярамай табиатларнен толдурсалар, гузель ахлякъ ве яхшы арекетлер бекленмез.
Беденимизни раатсыз эткен хасталыкълар насыл этип иляджнен тедавийленсе, рухумызны да онда олгъан чиркин табиатларны ташлап, оларнынъ ерине яхшы табиатлар ерлештирип тедавийлемек мумкюн.
Севгили Пейгъамберимиз: «Ахлякъынъызны гузеллештиринъиз» деп буюрып, ярамай ахлякъны гузел ахлякъкъа чевирмеге мумкюн олгъаныны косьтере.
Бир адамда юкъумлы бир хасталыкъ олса, онынънен отурып тургъанларгъа де кечмеси мумкюн. Ярамай ахлякълы инсанларнен аркъадашлыкъ эткенлер де оларнынъ арекетлеринден тесирленирлер ве яваш-яваш яхшы табиатларыны гъайып этип, ярамай ахлякълы олурлар. Бу себепнен, яхшы ахлякъ саиби олмакъ ве буны девам эттире бильмек ичюн гузель бир ахлякъ дерси алып, илимли ве яхшы ахлякълы инсанларнен аркъадашлыкъ этип , ярамай ахлякълы инсанлардан сакъынмакъ керекмиз.
Севгили Пейгъамберимиз:
- Яхшы адамларнен аркъадашлыкъ япмакъны, гузель къокъулар сатылгъан бир тюкянда отурмагъа бенъзеткен. Тюкян саиби о адамгъа бир шей бермесе де, о ернинъ гузель къокъуларындан файдаланыр.
- Ярамай адамларнен аркъадашлыкъ япмакъны да демирджи тюкянында отурмагъа бензеткен. О ерде отургъан адамгъа я бир атеш къыгъылчымы сычрар я да ярамай къокъусындан раатсыз олур. (Муслим)
Иште, бунынъ киби яхшы инсанларнен аркъадашлыкъ япкъангъа, яхшы инсанларнынъ гузель ахлякъы тесир эте, о да яхшы ахлякълы ола. Ярамай ахлякълы инсанларнен аркъадашлыкъ япкъанларгъа да оларнынъ ярамай арекетлери тесир эте ве яваш-яваш инсаннынъ яхшы ахлякъы бозула, ярамай ахлякълы ола.
Бизим вазифемиз аркъадаш сайлагъанда дикъкъатлы олмакъ, яхшы ве бильгили кишилернен дост олмакъ, оларнынъ сёз ве субетлеринден файдаланмакъ, ярамай инсанлардан узакъ турмакътан ибарет. Анджакъ, бизлер инсанларны ярамай арекетлерден къуртармакъ ичюн оларгъа якълашмакъ ёлларыны къыдырмалымыз ве яхшы ахлякъ саиби олмаларына ярдымджы олмалымыз
Комментариев нет:
Отправить комментарий