Япылгъан яхшылыкъкъа берильген къаршылыкъ «мукяфат», ишленильген феналыкънынъ къаршылыгъы да «джеза»дыр.
Инсанлар бу дюньягъа имтиан этильмек ичюн ёлланылды ве оларгъа япмалары керек олгъан вазифелер бильдирильди. Аллахнынъ эмирлерини ерине кетирген, ясакъларындан къачынгъан ве инсанларгъа яхшылыкъ япкъанлар имтианны къазангъан оладжакъ ве буюк мукяфат аладжакълар. Эр кес дюньяда япкъанларынынъ къаршылыгъыны эксиксиз оларакъ кореджек.
Юдже Аллах шойле буюра:
«Къыямет кунюнде догъру теразилер къурармыз: ич бир кимсе ич бир акъсызлыкъкъа огъратылмаз.»Энбия суреси, 47.
«Ким зерре къадар яхшылыкъ япкъан олса оны корер, ким де зерре къадар ярамайлыкъ япкъан олса оны корер.» Зильзаль суреси, 7-8.
Дженнет муминлер ичюн азырлангъан мукяфат еридир.
Дженнетте, бу дюньяда козьлернинъ корьмеген, къулакъларнынъ эшитмеген ве ич бир инсаннынъ хаялындан биле кечмеген ниметлер бар. Дженнет инсаннынъ юрегинден кечкен ве арзу эткен эр шейни буладжагъы, бенъзерсиз гузелликлернен толу бир ердир. Анда эр шей инсаннынъ гонъюлине коредир, нени арзу этсе аман янында пейда оладжакътыр.
Дженнетте хасталыкъ, къоркъу, гъам ве къасевет ёкътыр. Анда инсан эр вакъыт яш оларакъ къаладжакъ, ич къарт олмайджакъ. Дженнетте яшайыш сонъсуздыр. Олюм ёкътыр. О ерге кирген бир даа чыкъмайджакъ, джаны истеген эр шейге къавушаджакъ. Зевкъ ве сефа ичинде сонъсузгъа къадар яшамагъа девам этеджек.
Къуран-ы Керимде мевзунен алякъалы аетте шойле буюрыла:
«Иман этип эйи, файдалы ишлер япкъан кимселер дженнетлик олгъанлардыр, олар анда эбедий къаладжакълар.» Бакара суреси, 82.
«О ерде олар ичюн истегенлери эр шей бар ве янымызда арткъачы да бар.» Каф суреси, 35.
Аллахкъа нисбетен вазифесини япмагъан, харамлардан сакъынмагъан ве инсанларгъа ярамайлыкъ япкъанлар бу арекетлерининъ къаршылыгъы оларакъ джехеннемде джеза аладжакълар.
Джехеннем иман этмеген кимселернен, иман эткени алда гунях ишлегенлернинъ ахыретте атешнен джезаландырыладжакълары бир ердир. Имансыз ольгенлер мында сонъсуз оларакъ къаладжакълар.
Инангъаны алда, Аллахнынъ эмирлерине уйгъун арекет этмегенлер, диний вазифелерини ерине кетирмегенлер белли бир муддет джехеннемде къалып, джезаларыны чекккен сонъ чыкъаджакъ ве дженнетке киреджеклер. Кяфирлер ве мунафыкълар эбедий оларакъ джехеннемде къаладжакълар.
Къуран-ы Керимде кяфир ве мунафыкълар акъкъында шойле айтыла:
«Инкяр эткен кимселер ве аетлеримизни ялан сайгъанлар джехеннемлик олгъанлардыр. Олар о ерде темелли къаладжакълар.» Бакъара суреси, 39
«Догърусы мунафыкълар джехеннемнинъ энъ ашагъыдаки табакъасындадыр, оларгъа ярдымджы буламайджакъсынъ.» Ниса суреси, 145.
Комментариев нет:
Отправить комментарий