КЪЫЯМЕТ

Даа эвель беян эткенимиз киби, Аллахнынъ такъдир эткен вакъыт кельгенде дёрт буюк мелектен бириси олгъан Исрафильнинъ «Сур» деп айтылгъан шейге уфюрмесинен пек къоркъунч сес мейдангъа келеджек. Бу сеснинъ тесиринен бутюн джанлылар оледжек, кяинатта муим денъишмелер оладжакъ.

 Шойле ки, коклер ярыладжакъ, дюньямызны айдынлаткъан кунеш ышыгъыны гъайып этеджек, коклерни сюслеген, геджелеримизни айдынлаткъан ай тутуладжакъ ве кунешнен бирлешеджек.

Кок юзюнде парыл-парыл парылдагъан йылдызлар сёнеджек ве бурчакъ киби тёкюледжек, ер юзю дешетли бир зельзеленен сарсыладжакъ, денъизлер къайнайджакъ, дагълар еринден къопарылып, памукъ киби атыладжакъ, кыскъасы: кяинатнынъ бугуньки тертип ве низамы бозуладжакъ, ер ве коклер башкъа шекиль аладжакъ.

Иште, бу буюк вакъиагъа къыямет деп айтыла. Къыметнинъ не вакъыт мейдангъа келеджегини тек Аллах биле.