НАМАЗ ВАКЪЫТЛАРЫ

Куньде беш вакъыт намаз бар. Булар: саба, уйле, экинди, акъшам ве ятсы намазлары. Намазларнынъ эр бирисининъ белли вакъыты бар. Эр намазнынъ озь вакътында къылынмасы шарт. Бир намазны вакътындан эвель къылмакъ джаиз (мумкюн) олмагъаны киби, себепсиз оларакъ намазны вакътындан сонърасына къалдырмакъ да буюк гуняхтыр. Къуран-ы Керимде шойле буюрыла:

 «Шубесиз намаз, муминлер узерине белли вакъытларда фарз кылынды». Ниса суреси, 103.

1. Саба намазынынъ вакъты 

Сабагъа къаршы танъ ерининъ агъармагъа башламасындан, кунешнинъ догъувына къадар олгъан вакъыттыр. Яни кунешнинъ тогереги чыкъмагъа башладымы саба намазынынъ вакъыты бите.

2. Уйле намазынынъ вакъты

 Кунеш там тёпемизге келип, кольге шаркъ тарафына узанмагъа башлагъаны вакъыттан итибарен - кунеш энъ тёпеде олгъанда бар олгъан кольге мустесна - эр шейнинъ кольгеси эки къат олгъангъа къадар девам эткен вакъыт.

3. Экинди намазынынъ вакъты 

Уйле намазы вакътынынъ битмесинден, кунеш баткъангъа къадар олгъан вакъыт.

4. Акъшам намазынынъ вакъты 

Кунеш баткъан сонъ башлап, кунешнинъ баткъан ерде къызыллыкъ ве ондан сонъра кельген беязлыкъ гъайип олгъандже девам эткен вакъыт.

 5. Ятсы намазынынъ вакъты 

Акъшам намазынынъ вакъты чыкъкъан сонъ башлана, саба намазынынъ вакъты киргендже девам эте.

6. Витир намазынынъ вакъты 

Витир намазынынъ вакъты да ятсы намазынынъ вакътыдыр. Анджакъ витир намазы, ятсындан сонъра къылыныр.

7. Джума намазынынъ вакъты 

Уйле намазынынъ вакътыдыр.

8. Теравих намазынынъ вакъты 

Ятсы намазынынъ вакътыдыр.

9. Байрам намазынынъ вакъты 

Байрам куньлери саба кунешнинъ догъушындан 50 дакъкъа кечкен сонъ башлап, кунешнинъ тёпе нокътагъа келювине къадар девам эткен вакъыт.