ПЕЙГЪАМБЕРИМИЗНИНЪ -саллаллаху алейхи ве селлем МЕККЕДЕН МЕДИНЕГЕ ХиджретИ (М. 622)

Ислям тарихында Пейгъамберимиз -саллаллаху алейхи ве селлем-нинъ Меккеден Мединеге кочьмесине «Хиджрет» дениле.

Мушриклернинъ баскъы ве зулумларынынъ девам этмеси узерине Пейгъамберимиз -саллаллаху алейхи ве селлем-, мусульманларнынъ Меккеден Мединеге хиджрет этмелерине изин бере. Мусульманлар группалар алында Мединеге кочьмеге башлайлар. Дин огърунда догъып оськен юртларыны, мал ве мульклерини ташлайлар. Мединеде янгъан умют ышыгъына къавушмакъ ичюн аджеле этелер.

Меккеде Пейгъамберимиз -саллаллаху алейхи ве селлем- нен бирликте Хазрети Эбу Бекир, Хазрети Али ве бир къач мусульмандан башкъа кимсе къалмагъан эди. Пейгъамберимиз -саллаллаху алейхи ве селлем- бутюн зорлукъларгъа бакъмадан вазифесини эда эте, Пейгъамберлигининъ он учь йылыны Меккеде отькере.

 Мушриклер, Мединелилернинъ мусульман олмасы ве Меккедеки мусульманларнынъ да Мединеге кочьмесинен къуветли бир Ислям джемиетининъ пейда олмасындан къоркъкъан эдилер. Ислямиетни тамырыдан ёкъ этмек ичюн «Дарун’н-Недве» дейильген ерде гизли топланалар‚ Эбу Джехильнинъ теклифинен Пейгъамберимиз -саллаллаху алейхи ве селлем-ни ольдюрмеге къарар берелер. Бу къоркъунч къарарны беджермек ичюн эр къабиледен бирер генч сайлайлар. Сайлангъан бу силялы генчлер, Пейгъамберимиз -саллаллаху алейхи ве селлем-нинъ эвини сарып алалар ве тышарыгъа чыкъмасыны беклемеге башлайлар.

Мушриклернинъ гизлидже алгъан бу олюм къарарыны, Аллах тарафындан Джебраиль васытаджылыгъынен Пейгъамберимиз -саллаллаху алейхи ве селлем-ге бильдириле ве хиджрет этмесине изин бериле. Пейгъамберимиз -саллаллаху алейхи ве селлем-, кенди ятагъына Хазрети Алини ятыртып, эвини саргъан мушриклернинъ арасындан чыкъа ве Хазрети Эбу Бекирнинъ эвине кете. Аллах севгили Пейгъамберини къорчалагъан эди. Силялы мушриклер оны корьмейлер.

 Ёл азырлыкълары япылгъандан сонъра, Пейгъамберимиз -саллаллаху алейхи ве селлем- Хазрети Эбу Бекирнен берабер, гедже вакъты Меккеге бир ярым саат месафеде олгъан Севр магъарасына сакъланалар. Саба олгъан вакъыт Пейгъамберимиз -саллаллаху алейхи ве селлем-нинъ эвинден чыкъкъаныны билелер. Бунынъ узерине мушриклер эр ерде оларны къыдырмагъа башлайлар. Мухаммедни ким тапса, онъа 100 деве мукяфат бериледжегине ваде берелер.

 Пейгъамберимиз -саллаллаху алейхи ве селлем-ни къыдыргъанлар ёлдаки излерни такъип этип магъаранынъ огюне къадар келелер. Магъаранынъ кириш ерине бир орюмджекнинъ агъ орьгенини корелер. Магъаранынъ ичине кирип къыдырмагъа истейлер, амма ичлеринден бири: «Ичериге инсан кирсе эди, мында орюмджекнинъ агъы ве гогерджиннинъ ювасы олмаз эди» дей ве къайтып кетелер.

Мушриклер магъаранынъ огюне кельгенлери вакъыт Хазрети Эбу Бекир теляшланып:
- Бизни кореджеклер, я Расуляллах, - дей.
Пейгъамбер Эфендимиз -саллаллаху алейхи ве селлем-:
 -Теляшланма, Аллах бизнен берабердир, - деп айта.

Магъаранынъ кириш еринде орюмджекнинъ агъ орьмеси, анда оськен бир терек далларына гогерджинлернинъ юва япып, йымырта къоймасы бирер муджизедир. Юдже Аллах, севгили Пейгъамберини бу муджизелернен къорчалай.

Пейгъамберимиз -саллаллаху алейхи ве селлем- ве Хазрети Эбу Бекир магъарада учь кунь къалгъандан сонъра Мединеге кетмек ичюн ёлгъа чыкъалар. Оларны такъип эткен Суракъа адлы бир пехливан излерини тапа. Бутюн кучюнен атыны чаптырып, оларгъа якълаша. Тамам бу вакъыт атынынъ аякълары тая. Кендиси де ерге йыкъыла. Янъыдан турып бутюн къуветинен атыны текрар илери сюре. Факъат бу кереси атынынъ аякълары тизлерине къадар къумгъа бата. Огге бир адым атып оламай. Гизли бир къувет атыны арткъа къайтара эди. Бу алны корьген Суракъаны къоркъу баса. Япкъанына пешман ола. Пейгъамберимиз -саллаллаху алейхи ве селлем-ден афу сорай ве артына къайта. Арттан кельгенлерге де: «Мен бу ерлерни бакътым‚ мында кимсе ёкъ» деп оларны артына къайтара. Суракъа бу вакъиадан сонъ Ислямны къабул эте.

 Севгили Пейгъамбермиз -саллаллаху алейхи ве селлем- эки афта сюрген тарихий ёлджулыгъыны тамамлап, бир базар эртеси куню Медине якъынындаки Куба коюне барып ете. Мында оны буюк бир севгинен къаршылап алалар.

Пейгъамберимиз -саллаллаху алейхи ве селлем- мында Куба джамисини яптыра. Джами япылыгъанда мубарек эллеринен таш ташый. Бир ишчи киби чалыша. Бу Ислям тарихында япылгъан ильк джами эди. Пейгъамберимиз -саллаллаху алейхи ве селлем-ден учь кунь сонъра Меккеден ёлгъа чыкъкъан Хазрети Али де бу ерде Пейгъамберимиз -саллаллаху алейхи ве селлем-ге етише.