ТЕЙЕММУМ

Ниет этип темиз топракъ я да топракъ джынсындан бир шейге эллерини урып бетини ве къолларыны месх этмеге тейеммум дейилир.Абдест алмакъ я да гъусуль алмакъ ичюн сув тапылмагъаны вакъыт тейеммум этмек, абдест ве гъусуль ерине кечер.

ТЕЙЕММУМНЫНЪ ФАРЗЛАРЫ 

Тейеммумнынъ фарзлары эки данедир:

 1. Ниет этмек.

2. Эллерни темиз бир топракъкъа я да топракъ джынсындан бир шейге эки дефа урып, биринджи ургъанда бетни, экинджисиниде къолларны (тирсеклерге къадар) месх этмек.

ТЕЙЕММУМНИНЪ СУННЕТЛЕРИ

 1. Башында «бисмиллях» окъумакъ.

2. Сыраны козетмек.

3. Арекетлерни аралыкъсыз, яни беклемеден бир-бири артындан япмакъ.

4. Топракъ устюне эллерни къойгъан сонъ эвеля илери сюрьмек.

5. Сонъра кери чекмек.

 6. Пармакъларны ачыкъ тутмакъ.

7. Эллерни ерден котергенде, эгер тозлу исе эллерни бир-бирине къакъып сильтемек.

ТЕЙЕММУМ НАСЫЛ ЯПЫЛА 

Енълер тирсеклернинъ юкъарысына къадар къатлана. Тейеммум алмагъа ниет этиле. Пармакълар ачыкъ бир алда эллер темиз топракъ, къум я да тоз устюне къоюла ве огге-арткъа чекиле. Эллер пек тозлангъан исе ян-яна кетирип баш пармакълар олгъан ерлер бирбирине яваштан урулып, тозлар къакъыла.

 Сонъра эллернинъ ичинен бетнинъ тамамы бир кере месх этиле, яни силине.

Эллер текрар топракъ устюне къоюла, сонъра сол эльнинъ авуч ичинен сагъ къол тирсеклернен берабер, сагъ эльнинъ авуч ичинен де сол къол тирсеклернен берабер месх этиле.

ТЕЙЕММУМНЫ БОЗГЪАН ШЕЙЛЕР 

1. Абдестни бозгъан шейлер тейеммумны да бозар; 

2. Абдест ве гъусуль аладжакъ къадар сув тапылса (пейда олса) ве бу сувны къулланмакъ мумкюн олса тейеммум бозула;

 3. Бир яра я да мазереттен долайы беденине, тенине сув токъундырмакъ зарарлы олгъаны ичюн тейеммум этмек меджбуриетинде къалгъан кишининъ мазерети кечкени вакъыт тейеммум бозула. 

                                             ТЕЙЕММУМ насыл АЛЛАРДА ЯПЫЛА 

1. Абдест я да бой абдести аладжакъ къадар темиз сув олмагъаны вакъыт;

 2. Сув олып да, бу сувнынъ къулланылмасы мумкюн олмагъан алларда;

 3. Беденнинъ бутюни я да чокъусы яра олып, сув къулланмакъ зарарлы олгъанда; 

Тейеммум, севгили Пейгъамберимиз ве биз мусульманларгъа ибадетлеримизни раатлыкънен япмакъ ичюн Юдже Аллахнынъ ихсан эткен бир къолайлыкътыр.