Узеринде яшагъанымыз топракъларгъа ветан деп айтыла. Шеэрлеримиз, койлеримиз, джамилеримиз ветан топракъларынынъ узериндедир. Мектеплеримиз, фабрикаларымыз, къыскъасы эр шейимиз, ветанымыз сайылгъан бу топракъларнынъ узеринде ерлешкен.
Баба-деделеримиз дюньянынъ энъ гузель ве энъ берекетли топракъларыны ветан оларакъ сайлагъанлар ве бизге эманет эткенлер. Бу эманетни къорчаламакъ динимизнинъ эмри ве эпимизнинъ вазифемиз.
Баба-деделеримиз мубарек ветан топракъларыны душманларгъа бермемек ичюн къараманджа курештилер, джанларыны севе-севе феда эттилер. Эр къарыш топрагъы шеит къанынен суварылгъан ветанымызнынъ къыйметини пек яхши бильмек керекмиз. Бунынъ ичюн ; ветанны севмек, керек олгъанда ветанымызны душманлардан къорчаламакъ ичюн курешмек ве бу ёлда джанымызны севе-севе феда этмек мукъаддес бир вазифедир. Ветан севгиси - ялынъыз оны къорчаламакъ дегиль, бунынънен берабер ветанымызнынъ ве бу ветанда яшагъан мусульманларнынъ юксельмеси ичюн тырышмакътыр.
Ветаныны севген, топрагъыны ишлер, ёлларыны япар, орманларыны къорчалар, эм джамилер къурар, эм де фабрикалар къурып чалышыр. Бойлеликнен, эм маневий, эм де маддий юкселюв олур. Ветаныны севген миллетине хызмет этмекни де шерефли бир вазифе оларакъ саяр. Севгили Пейгъамберимиз: «Инсанларнынъ ичинде энъ хайырлысы - башкъа инсанларгъа файдалы олгъаныдыр», - деп буюра.
Комментариев нет:
Отправить комментарий