АХЫРЕТ КУНЮНЕ ИМАН

Иманнынъ шартларындан бешинджиси «Ахырет кунюне инанмакъ»тыр. Инсанларнынъ ве башкъа джанлыларнынъ бир сонъу олгъаны киби, узеринде яшагъанымыз бу дюньянынъ да бир кунь сонъу келеджек. Аллахнынъ такъдир эткен вакъыт кельгенде вазифели мелек Исрафиль, «Сур» деп адландырылгъан бир шейге уфлейджек ве бундан чыкъаджакъ пек мудхиш бир сеснинъ тесиринен (Аллахнынъ тилегени тышында) бутюн джанлылар оледжеклер. Ер ве коклернинъ низамы бозулып, кяинат бутюнлей денъишеджек, башкъа шекиль аладжакъ.

 Къыямет деп айтылгъан бу вакъиадан белли бир муддет кечкен сонъ Аллахнынъ эмиринен Исрафиль, «Сур»гъа экинджи кере уфлейджек ве бутюн инсанлар янъыдан тириледжек, «Махшер» деп айтылгъан топлашув ерине чагъырыладжакъ. Инсанларнынъ топланаджагъы бу ерге Махшер мейданы деп айтыла. Мында эр кес Аллахнынъ узурына чыкъарыладжакъ ве дюньяда япкъанларындан соруладжакъ. «Кирамен Кятибин» мелеклери тарафындан эйилик ве феналыкъларнынъ язылгъан «амель дефтерлери» адамнынъ къолуна бериледжек ве эр кес дюньяда япкъаныны амель дефтеринде корип окъуйджакъ.

Дюньяда гизли ве ачыкъ ишленген бутюн къабаатлар ортагъа чыкъарыладжакъ, эйилик ве феналыкълар пек хассас адалет теразесинде тартыладжакъ ве инсан дюньяда япкъанларынынъ къаршылыгъыны кореджек.

Инсан, дюньяда не сачкъан олса ахыретте оны топлайджакъ, иляхий адалет ерине келеджек ве ич кимсе акъсызлыкъкъа огърамайджакъ.

Севгли пейгъамберимиз шойле хабер бере:

«Къыямет кунюнде адам дёрт шейден суаль-джевапкъа чекильмеден Аллахнынъ узурындан айырылмаз:
 - омюрини къаерде кечиргенинден;
 - беденини къаерде ипраткъанындан;
 - малыны насыл къазанып, къайда масраф эткенинден; 
- бильгенлерине не къадар амель эткенинден». Эт-Тергъип ве’т-Терхиб, дж. 1, с. 125. 

Бу янъыдан тирилювнен башлагъан ве сонъсузгъа къадар девам этеджек вакъыткъа «Ахырет куню» дейиле. Иште, бутюн инсанларнынъ ольген сонъ янъыдан тирилювине ве бундан сонъ девам этеджек сонъсуз аяткъа инанмакъ иманнынъ энъ муим эсасларындан биридир.