АХЫРЕТКЕ ИМАННЫНЪ ФАЙДАЛАРЫ

1. Ахырет кунюне инанмакъ инсангъа месулиет дуйгъусыны къазандыра. Месулиет дуйгъусы ташыгъан бир адам арекетлерине дикъкъат этер.

Ахыретке инанмакъ демек; ольген сонъ текрар тириледжегимизге ве дюньяда япкъан ишлеримизден Аллахнынъ узурында эсап береджегимизге, яхшылыкъ япкъанларнынъ мукяфат , ярамайлыкъ япкъанларнынъ исе джеза аладжакъларына инанмакъ демектир. Бу инам инсанны ярамайлыкъ япмакътан сакъындырыр, яхшылыкъкъа ве догърулыкъкъа чекип, ахлякъ ве фазилет саиби япар. Бунъа инангъан инсанлардан мейдангъа кельген бир джемиетте ич кимсе башкъасына зарар бермез, эр кес бири-бирининъ акъкъына сайгъы косьтерир, элинден кельгени къадар яхшылыкъ япар. Бу арекетлер инсанлар арасында озьара севги ве ишанч ислерини инкишаф эттирир. Шахысларнынъ тербиели олмасында, джемиетнинъ тынч ве мабет олмасында ахырет кунюне инанмакънынъ пек буюк эмиети бар.

 2. Ахыретке инангъан бир инсан, кечиджи олгъан дюньяда, даа юксек ве сонъсуз олгъан аяткъа азырланыр. Узун бир ёлджулыкъкъа чыкъаджакъ инсан етерли дереджеде ашайт алыр, азырлыкъ япар. Ашайт алмадан, азырлыкъ япмадан ёлгъа чыкъмаз.

Албуки, ольген сонъ девам этеджек олгъан ахырет ёлджулыгъы дюнья узеринде япылгъан ёлджулыкълардан даа узун ве эмиетлидир. Бу себептен ахырет ичюн даа чокъ азырлыкъ япмакъ керекмиз.

Ахырет кунюне инангъан адам Аллахнынъ эмирлерини ерине кетирип, ясакъларындан сакъынмакъ суретинен ахырет азырлыгъыны япкъан олур. Азырлыкълы оларакъ ёлгъа чыкъкъанлар даа юксек бир аяткъа къавушаджакълар. Юдже Аллах бу мевзуда «керекли шейлер теминленъ» демекнен, азырлыкъ корьмемизни истей.

 Ахырет ичюн азырлыкъ япмагъанлар олюм анында керчеклерни кореджек ве Аллахнынъ эмирлерини япмакъ ичюн дюнья аятына янъыдан къайтмагъа истейджеклер. Факъат иш иштен кечкенинден себеп бу истек къабул этильмез. Бу меселе акъкъында Къуран-ы Керимде шойле хабер бериле:

 «Олардан бирисине олюм кельгенде: Раббим! Мени арткъа къайтар, бельки бош кечиргеним дюньяда яхшы ишлер япарым. Хайыр, бу онынъ агъызындан чыкъкъан бош лафтыр. Оларнынъ артында исе тириледжеклери куньге къадар бир берзах (маниа) бардыр.» Муминун суреси, 100.

3. Ахырет кунюне инанмакъ инсангъа теселли берир, къасеветини азалтыр.

Шойле ки:

 Дюньяда нидже яхшы адамлар яхшылыкъларынынъ къаршылыгъыны корьмеден; акъсызлыкъкъа огърагъанлар акъкъыны алмадан; нидже залымлар да джезасыны чекмеден олюмге кетелер. Акълы олгъаннен акъсыз олгъанны, яхшынен ярамайнынъ айрыладжагъы ве эр кеснинъ япкъанларынынъ къаршылыгъыны толусынен буладжагъы кунь – Ахырет кунюдир. Ахырет кунюнде иляхий адалет ерине келеджек; эйилик япкъанларгъа эйиликлерининъ мукяфаты бол-бол бериледжек, акъсызлыкъкъа огърагъанлар эксиксиз суретте акъларыны аладжакъ; залымларнынъ япкъанлары янларына къалмайджакъ, акъ эткенлери джезаны буладжакълар. Иште, бунъа инанмакъ инсангъа хошнутлыкъ берир, къасеветлерини, къаарьлерини азалтыр.