ПЕЙГЪАМБЕР ЭФЕНДИМИЗ ХАЗРЕТИ МУХАММЕД -саллаллаху алейхи ве селлем ИНСАНЛАРНЫ НЕГЕ ЧАГЪЫРА ЭДИ

 (Пейгъамберимизнинъ ильк джума хутбеси)

 «Эй адамлар, олюм кельмеден эвель Аллахкъа тевбе этинъ. Фырсат къачмагъандже яхшы амеллер, ишлер япмагъа тырышынъыз. Гизли ве ачыкъ шекильде чокъ садакъа берип, Аллахны чокъча анъып, Онъа якъынлашынъыз. Бойле япсанъыз, рызыкъландырылырсынъыз, ярдым корер ве эльден кеткен шейлеринъизни къайтарып алырсынъыз».

«Билинъиз ки, Аллах сизге къыяметке къадар Джума намазыны фарз къылды. Ким, мен аятта экен, я да менден сонъра, эмиетсиз сайып, джуманы терк этсе, Аллах онынъ ишлерини онъындан кетирмесин. Тевбе этмегендже о инсаннынъ башкъа эйилиги ёкътыр. Ким тевбе этсе, Аллах онынъ тевбесини къабул этер».Ибн Мадже, Икъаме, 78.

 «Эй адамлар, ахырет ичюн сагълыгъынъызда азырлыкъны япынъыз. Мытлакъа эр биринъиз вефат этеджек ве сюрюсини чобансыз ташлайджакътыр. Сонъра Аллах онъа терджимансыз ве вастасыз айтаджакъ ки: «Меним эльчим санъа келип, эмирлеримни теблигъ этмедими, хабер бермедими? Мен санъа мал-мульк бердим, пек чокъ эйилик яптым, сен де озюнъ ичюн не азырлап кетирдинъ?» Бу суальнен къаршылашкъан эр кес сагъына ве солуна бакъаджакъ, бир шей корип оламайджакъ, огюне бакъаджакъ ве джехеннемден башкъа бир шей корьмейджек. Бунъа коре, ким озюни ярым хурманен биле олса (яни аз бир шейнен олса биле) атештен къуртарып оладжакъ исе, о хайырлы ишни аман япсын. Оны да тапамаса, татлы бир сёз айтып яхшылыкъ этсин».Ибн Хишам, дж. 1, с. 277-278.

 «Эй инсанлар, Аллаху Тааля джахиллик девиринден къалма бутюн ярамай адетлеринъизни ве ата-эдждатларынъызнен макътанмакъны котерип атты. Бутюн инсанлар Адемден, Адем исе топракътандыр. Инсанлар эки къысымдыр. Биринджиси, Аллах къатында эйи, шерефли ве муттакъий (Аллахтан сакъынгъанлар), экинджилери исе - залым ве къыйметсиз олгъанлардыр…».

 «Дикъкъат этинъиз, дюнья сизге артыны чевирген алда кете. Ахырет исе, сизге догъру келе. Дикъкъат этинъиз, сиз шу анда эсабы олмагъан амель куньлерини яшайсынъыз. Факъат, амели олмагъан эсап куню чокъ якъындыр. Аллах дюнья ниметлерини, севген ве севмеген бутюн къулларына бере. Ахырет ниметлерини исе ялынъыз севгенлерине береджектир».