Ислямнынъ беш шартындан экинджиси намаз къылмакътыр. Инсанларнынъ биринджи вазифеси, Аллахнынъ барлыгъына ве бирлигине, Хазрети Мухаммеднинъ -саллаллаху алейхи ве селлемПейгъамберлигине инанмакътыр. Имандан сонъра фарзларнынъ энъ эмиетлиси намаздыр. Беш вакъыт намаз, ижреттен бир ярым йыл эвель Мирадж геджесинде фарз къылынды.
Намаз рухны темизлеген, юрекни айдынлаткъан, инсанны Аллахнынъ узурына юксельткен бир ибадеттир.
Севгили Пейгъамберимиз: «Намаз диннинъ дирегидир» деп, намазнынъ динимизде пек муим бир ибадет олгъаныны къайд эткендир. Намаз, бизге беден ве рух темизлиги къазандыргъан бир нурдыр. Бу саеде мусульман гунях кирлеринден арыныр ве дженнетке кирмеге ляйыкъ, темиз бир къул олур.
Пейгъамбер эфендимиз -саллаллаху алейхи ве селлем- бу мевзуда шойле буюра:
«Сизден бирисининъ къапусы огюнде бир озен олса, ве о киши шу озенде куньде беш кере ювунып чыкъса онда кир намына бир шей къалырмы?»
Динълегенлер:
«Ич кир къалмаз, эй Аллахнынъ ресули!»- деп джевап бердилер.
Пейгъамберимиз: «Иште беш вакъыт намаз да бунъа бенъзер, Аллах намазнен гуняхларны силер», - деп буюрды. Бухари, дж. 2, с. 475.
Намаз, юреклерге Аллах къоркъусынынъ ерлешмесине ярдымджы олып, инсанны гунях ишлемектен сакълар. Бу керчек Къуран-ы Керимде шойле бильдирильген:
«Санъа вахий этильген китапны окъу, намазы дос-догъру къыл. Керчектен намаз, хаясызлыкътан ве феналыкътан четке чекер». Анкебут суреси, 45.
Намазыны догъру къылгъан бир киши гунях ишлемектен къуртулып, иманыны къуветлендирир. Аллахнынъ разылыгъыны къазаныр. Дженнетнинъ айдын ёлу онъа ачылыр. Мусульман намаз къылмакънен мукеллеф олгъаны киби, балаларына да намазны огретмеге меджбурдыр. Севгили Пейгъамберимиз шойле буюрды:
«Балаларынъыз еди яшына кельгенде, оларгъа намаз къылмакъны эмир этинъ». Кешфу’ль-Хафа, дж. 2, с. 203.
Ана ве баба еди яшына кирген балаларына намаз къылмагъа огретсе балалар пишкинлик яшына кельгендже намазгъа бутюнлей алышалар.
Комментариев нет:
Отправить комментарий