Темизлик ялынъыз беден, урба ве эвлернинъ ич темизлигинден ибарет дегиль. Динимизде темизликнинъ мейданы даа да кеништир. Бу себепнен чевре темизлиги узеринде айрыджа токъталмакъ керек. Чюнки чевре темизлиги ялынъыз озюмиз ичюн дегиль, башкъаларгъа да алякъалы олгъан бир меселедир. Чеврени, этрафны кирлетмек, башкъаларны раатсыз этмек, дигер инсанларгъа зарар бермек демектир. Албуки, мусульман башкъаларына зарар бермеген, ич бир джанлыны ынджытмагъан кимседир.
Пейгъамбер Эфендимиз «Азбарларынъызны темизленъ» деп буюрып, эвлернинъ этрафыны да темиз тутмакъ кереклигини беян эткендир.
Темиз олгъан чеврени кирлетмек чокъ ярамай бир иш ве мусульмангъа ярашмагъан чиркин бир арекеттир.
Пейгъамбер Эфендимиз: «Лянетке огърагънлардан олмакътан сакъынынъ», - деди.
Бунынъ узерине асхаб:
- Булар кимдир. Я Ресулаллах!?- деп сорагъанлары вакъыт, Пейгъамберимиз:
- Халкънынъ келип кечкен ёлны ве кольгелендиклери ерлерни пислегенлердир, - деп буюрды.
Инсанларнынъ келип кечкен ёлларны, отурып раатлангъан мекянларны ве истираат ерлерни кирлетип (кучюк я да буюк абдестини бозгъан, чёплюк ташлагъан, черкефли сув тёккен ве саире) башкъаларыны раатсыз этмек Ислям ахлякъынен багълы дегиль. Мусульман дигер инсанларны раатсыз эткен арекетлерни япмамалы. Эр кунь юргенимиз ёлларнынъ темиз ве бакъылгъан олмасына дикъкъат этмели, умумий ерлернинъ, бахча ве кезинти ерлернинъ темиз олмасына эмиет бермелимиз.
Пейгъамберимизнинъ акъмагъан сувларгъа абдест бозмакъны ясакъ этмеси, джамининъ диварында корьген тюкюрикни къолуна бир таш алып сильмеси, чевре темизлигине не къадар эмиет бергенини косьтермекте. Пейгъамберимиз, ерлерге тюкюрмеге биле изин бермегени алда, бир мусульман насыл олур да чеврени кирлетип инсанларны раатсыз эте биле. Насыл олур да башкъаларынынъ зарар корьмесине себеп оладжакъ арекетлер япар?
Пейгъамберимиз: «Согъан ве сарымсакъ ашагъан кимсе, бизден ве месджидимизден узакъ турсун», -деп буюра. Аслында согъан ве сарымсакъ хелял олгъан ашайтлардан. Ама буларны ашагъан инсанларнынъ агъыз къокъусы башкъа инсанларны раатсыз этер. Бу себепнен джамиге келеджеклер согъан ве сарымсакъ ашамамакъ керек, ашагъан олса буларнынъ къокъусы агъызындан кеткендже башкъаларынынъ янына якълашып раатсыз этмемек керек.
Аллах Тааля Къуран-ы Керимде, темизликке риает эткенлерни севгенини бильдире. Ойле исе темиз олайыкъ, чевремизни де темиз тутайыкъ ки, Аллахнынъ севген къулларындан олайыкъ. Темиз олгъан инсанларны башкъа инсанлар да север. Чеврени кирлетип башкъаларынынъ нефретини дегиль, темизликке дикъкъат этип инсанларнынъ севгисини къазанмагъа тырышайыкъ.
Комментариев нет:
Отправить комментарий