АКЪАБЕ БИАТЛАРЫ

Пейгъамбер Эфендимиз -саллаллаху алейхи ве селлем- йыллар девамында Мекке халкъыны Ислямгъа давет этти, лякин меккелилернинъ инамы юзюнден буюк зорлукъларнен къаршылашты. Амма оларнынъ туткъан ёлу Ислям Пейгъамберини вазифесинден вазгечирмеди. Ислямнынъ нуру инсанлыкъны айдынлатмгъа девам этеджек эди. Бунынъ ичюн Юдже Аллах янъы бир имкян берди. Ислямнынъ яйылмасы ичюн даа раат бир ер азырлады. Бу ер – Медине эди.

Пейгъамберлигининъ он биринджи йылы хадж мевсиминде Хазрети Мухаммед -саллаллаху алейхи ве селлем- Мекке тышына чыкъты. Мединеден кельген алты кишилик бир джемаатнен къаршылашты. Оларгъа Пейгъамбер олгъаныны айтты. Къуран окъуды. Аллахнынъ эмирлерини анълатты. Оларны мусульман олмагъа давет этти.

Мединелилер яхшы ниетли инсанлар эди. Пейгъамберимиз -саллаллаху алейхи ве селлем-нинъ айткъан шейлернинъ акъылгъа келишкенини ве догъру олгъаныны къабул этип мусульман олдылар. Олар Мединеге къайттылар ве анда Ислямны анълаттылар.

а. Биринджи Акъабе биаты (Пейгъамберлигининъ он экинджи йылы) 

Бир йыл кечкенден сонъ Меккеге келген мединелилерден 12 адамлыкъ бир группа, Мекке якъынында Акъабе дейильген ерде Пейгъамберимиз -саллаллаху алейхи ве селлем-нен корюштилер. Реислери Эсад бин Зураре эди. Араларында бир йыл эвель мусульман олгъан беш киши де бар эди. Булар: «Аллахкъа ширк къошмамакъ, хырсызлыкъ япмамакъ‚ зина этмемек, ялан ве ифтирадан сакъынмакъ, Пейгъамберге къаршы кельмемек» хусусунда Пейгъамберимиз -саллаллаху алейхи ве селлем-ге биат эттилер, сёз бердилер. Бу вакъиагъа I Акъабе биаты дейильди.

Мединелилер кендилерине Ислямны огретеджек бир кимсе истедилер. Пейгъамберимиз -саллаллаху алейхи ве селлем- де бу вазифени япмакъ ичюн Мусаб бин Умейрни ёллады. Мусаб -радиаллаху анх-, Мединеде Ислямнынъ огретильмеси ве яйылмасында буюк хызметлер япты.

 б, Экинджи Акъабе биаты (Пейгъамберлигининъ он учюнджи йылы)

 Бу йыл мусульманлардан 75 адамлыкъ бир джемаат Меккеге кельди. Буларнынъ экиси къадын эди. Акъабе денильген ерде Пейгъамберимиз -саллаллаху алейхи ве селлем- нен корюшкенлеринден сонъра экинджи Акъабе биаты керчеклешти. Бунъа коре , мединелилер озь къадынларыны, балаларыны насыл къорчаласалар‚ Пейгъамберимиз -саллаллаху алейхи ве селлем-ни де айны шекильде къорчалайджакъларына сёз бердилер. Эписи эллерини Пейгъамберимиз -саллаллаху алейхи ве селлем-ге узатып биат эттилер.

 Бундан сонъра Пейгъамберимиз -саллаллаху алейхи ве селлемозь араларындан он эки адамны темсильджи оларакъ сайламаларыны истеди. Олар он эки адамны темсильджи сайладылар. Эписи де Пейгъамберимиз -саллаллаху алейхи ве селлем-ге: «Тарлыкъ ве кенишлик анларында, эр вазиетте итаат этмеге, сёзнинъ даима догърусыны айтмагъа ве Аллах ёлунда эр анги шейден къоркъмамагъа» сёз бердилер.

Акъабе биатлары Ислямнынъ яйылмасында муим бир девир нокътасы олды.