АБДЕСТ - ФАРЗЛАРЫ, СУННЕТЛЕРИ, ЭДЕБИ

АБДЕСТНИНЪ ФАРЗЛАРЫ

 Абдестнинъ фарзлары дёрттир:

1. Юзни бир кере ювмакъ.

2. Къолларны тирсеклернен берабер бир кере ювмакъ.

3. Башнынъ дёртте бирини месх этмек, яни сылакъ къолнен сюртмек, сыйпамакъ.

4. Аякъларны топукъларнен берабер бир кере ювмакъ.

Бу фарзлардан бири эксик олса абдест сайылмай.

АБДЕСТНИНЪ СУННЕТЛЕРИ 

1. Абдест алмагъа ниет этмек.

2. Абдестни «Эузу-бисмиллях» нен башламакъ.

3. Тишлерни мисвакъ я да фырчанен ювмакъ, ич олмагъанда пармакънен окъаламакъ.

 4. Абдест азаларыны аралыкъсыз ювмакъ, яни бир аза къурумадан дигерини ювмакъ.

5. Ювгъанда азаларны яхшы этип окъаламакъ.

6. Агъызны учь кере чайкъамакъ, яни агъызгъа сув алып сонъра бошатмакъ (оразалы олгъанда агъызны дикъкъатлы чайкъамакъ керек ки, сув богъаздан ашагъа къачмасын).

7. Бурунгъа сагъ эльнен учь кере сув чекмек ве эр кересинде сол эльнен темизлемек (оразалы олмагъан вакъыт сувны бурунгъа эйидже чекмек).

8. Абдест азалары ювулгъаны вакъыт юкъарыда косьтерильген тертипке риает этмек, яни сырасынен бетни, къолларны ювмакъ, башны месх этмек ве сонъунда аякъларны ювмакъ.

9. Эр бир азаны учь кере ювмакъ.

10. Абдестте ювмагъа сагъ тарафтан башламакъ.

11. Абдестте эллерни ве аякъларны ювмагъа пармакълардан башламакъ.

 12. Сакъалы сыкъ олгъан кимсе сакъалыны ювгъанда сувны тенге еткизмеге тырышмакъ.

13. Пармагъындаки юзюкни ойнатмакъ.

14. Къулакъларны месх этмек.

15. Боюнны месх этмек.

16. Башыны толусынен месх этмек.

17. Пармакъларнынъ арасыны окъалап ювмакъ.

 АБДЕСТНИНЪ ЭДЕБИ 

1. Намаз вакъты кирмеден абдест алып намазгъа азыр олмакъ.

2. Абдестни алгъанда къыбла тарафкъа дёнмек.

3. Юксек бир ерге отурмакъ.

 4. Абдест алгъанда башкъасындан ярдым истемемек.

5. Абдестте сувны исраф дереджесинде чокъ къулланмамакъ.

6. Сувны абдест азаларындан тамламайджакъ дереджеде аз къулланмамакъ.

7. Абдест алгъан сонъ къыблагъа бакъып Келиме-и шехадет кетирмек.