КЪУРАН-Ы КЕРИМНИНЪ ХУСУСИЕТЛЕРИ

Энъ сонъ ве энъ буюк пейгъамбер Хазрети Мухаммед -саллаллаху алейхи ве селлем-ге Аллах тарафындан ёлланылгъан Къуран-ы Керим мусульманлыкънынъ мукъаддес китабыдыр.
Къуран-ы Керимни башкъа иляхий китаплардан айыргъан ве устюн япкъан бир чокъ хусусиетлер бар.

Бу хусусиетлернинъ энъ эсаслары шулар:

 1. Къуран-ы Керим пейгъамберимизге энгени киби ич бир денъишмеге огърамадан бизге къадар кельди. Къыяметке къадар да бозулмадан девам этеджек.

Башкъа мукъаддес китаплардан базылары бутюнлей гъайып олды, базылары да чокъ денъишмеге огърап бозулды ве ич бириси Аллахтан кельгени киби сакъланып къалмады.

Къуран-ы Керимни исе Аллахнынъ озю къорчалайджагъына сёз бере:

«Къуранны санъа Биз эндирдик, онынъ къорчалайыджысы да Бизмиз». Хиджр суреси, 9.

 Керчектен де Аллах Тааля, мукъаддес китабымыз Къуран-ы Керимни кунюмизге къадар къорчалады, къыяметке къадар да къорчалайджакъ.

 2. Къуран-ы Керим бир кереден дегиль де, парча-парча энди. Фаркълы вакъытлар ве фаркълы адиселерге коре ает ве сурелер алында энди. Бу шекильде кельмеси онынъ къолай эзберленмесини ве анълашылмасыны теминлей. 

3. Къуран-ы Керим сонъки иляхий китап. Ондан сонъра башкъа китап кельмейджек. Къураннынъ укюмлери къыяметке къадар кечерли оладжакъ, денъишмейджек. Эвельки китаплар исе белли бир вакъыт ичюн ёлланылгъан эдилер. 

4. Къуран-ы Керим бутюн инсанлыкъкъа ёлланылгъан бир китаптыр. Эр асырнынъ ихтияджларыны къаршылайджакъ акъикъат ве икметлернен толудыр. Албуки, башкъа мукъаддес китаплар белли миллетлерге ёлланылгъан эдилер. 

5. Къуран-ы Керим, Пейгъамберимизнинъ энгъ буюк ве даимий муджизесидир. Эм сёзлери, эм манасы, эм де кетирген юдже акъикъатлар мисильсиз бир муджизедир.