ТЕМИЗЛИК ДЖЕЭТИНДЕН СУВЛАР

1. Мытлакъ сувлар

Булар ягъмур суву, къар суву, голь, озен, денъиз, чокъракъ ве къую сувларыдыр. Сув дегенде булар акъылгъа келе. Бу сувларгъа башкъа бир шей къарышмагъандыр.

2. Мукъайед сувлар

Булар гуль суву, юзюм суву киби башкъа бир мадденен къарышыкъ сувлардыр. Бойле сувларнен абдест алынмаз, гъусуль япылмаз.

Темизлик джеэтиндэн «Мытлакъ сувлар» беш къысымгъа айрыла:

а. Эм темиз, эм де темизлейиджи олгъан ве къулланылмасы мекрух олмагъан сувлар:

 Булар тюсю, лезети, къокъусы бозулмагъан, аслы денъишмеген ве къулланылмагъан сувлардыр. Бу сувларнен эр тюрлю темизлик япылыр, абдест ве гъусуль алыныр. Булар емек ве ичмек ичюн де къулланылыр.

 б. Эм темиз, эм де темизлейиджи олмакънен берабер къулланылмасы мекрух олгъан сувлар:

Булар мышыкъ, тавукъ киби эв айванларынен, къартал, шахин, къаргъа киби йыртыджи къушлардан арткъан сувлардыр. Башкъа темиз сув бар экен бу киби сувларнен абдест алмакъ, гъусуль япмакъ, ичмек ве ашкъа къулланмакъ мекрухтыр. Башкъа темиз сув ёкъ олса бу киби сувларны къулланмакъ мекрух дегиль.

3.Темиз олмагъан сувлар

Булар ичине кирли бир шей тюшкен акъмагъан сувлардыр. Меселя; бир къопкъа, леген я да чапчакътаки сувгъа къан, сийдик, тезек парчасы я да башкъа бир пислик тюшсе бу сувлар кирли олур. Артыкъ бу сувнен темизлик япылмаз, абдест алынмаз. Копек, домуз ве йыртыджы айванлар баткъан (ичип къалдыргъан) сувлар да темиз дегиль ве ич бир темизлик ишинде къулланылмаз.

Эгер де буюк микъдарда сув олса, меселя, голь, озен, денъиз суву киби, буларнынъ учь темель сыфатындан (тюсю, лезети ве къокъусы) бир данеси бозулмагъандже кирли сайылмаз. Амма меселя, озеннинъ суву буланыкъ акъса бунынънен абдест алынмаз, чюнки ренги бозулгъандыр.

Базы хусуслар:

Денъиз суву тузлу олса да темиз сайыла. Абдест ве гъусуль алмакъ мумкюн.

Эгер сувнынъ озь лезети я да къокъусы фаркълы олса, яни табиатта о сув ойле олса, о вакъыт темиз сайылыр. Эсас олгъан, о сувгъа бир шей къарышып лезетини я да къокъусыны бозмамасыдыр. Меселя, базы улькелерде кукюрт я да бозулгъан йымырта къокъусы олгъан сувлар бар. Бойле сувлар темиздир.

Хлорлы сув да темиз сайыла. Чюнки бу тедбир дезинфекция япмакъ ичюн зарур.

Абдест ве гъусульде къулланылгъан сув да темиз сайыла, амма экинджи кереси о энди къулланылмаз. Онынънен ич бир темизлик япмакъ мумкюн дегиль.