КЪУРАН-Ы КЕРИМНИНЪ ЯЗЫЛУВЫ ВЕ МУСХАФ АЛЫНА КЕТИРИЛЮВИ

Къуран аетлери кельгенинен Пейгъамберимиз -саллаллаху алейхи ве селлем- вахий кятиплерини чагъыра, аетлернинъ къайсы суренинъ къайсы ерине языладжагъыны косьтере эди. Вахий кятиплери де косьтерильген ерге аетлерни яза эдилер. Сонъра пейгъамбер эфендимиз язылгъан аетлерни оларгъа окъута ве догъру язылгъаныны тешкере эди. Эндирильген аетлерни Асхаб-ы Кирам да окъуй ве чокъусы эзберлей эди. Бойлеликнен, Къуран-ы Керим эм язылып, эм де эзберленип сакъланды.

Пейгъамберимизнинъ сагълыгъында аетлер энмеге девам эткени ичюн Къураннынъ язылгъан саифелери мусхаф (яни бир китап) алына кетирильмеди. Къуран вахийнинъ битмесинен тамамланды.

Пейгъамберимиз -саллаллаху алейхи ве селлем-нинъ вефатындан сонъра халифе олгъан Хазрети Эбу Бекир сахабелернинъ буюклеринден бир эйет мейдангъа кетирди. Бу эйет айры-айры алда олгъан Къуран саифелерини топлады. Хафызларнынъ эзберлеген Къураннен тенъештирильди ве язып Мусхаф алына кетирильди.

 Къуран саифелерининъ бир арагъа топланып, китап алына кетирильген шеклине «Мусхаф» деп айтыла.

 Буны япкъанда Пейгъамберимизнинъ косьтерген тертипке коре сурелер белли бир сырагъа къоюлды. Топланып мусхаф алына кетирильген Къуран, халифе Хазрети Эбу Бекир янында сакъланды.

Даа сонъра, Ислямнынъ яйылмасы нетиджесинде Хазрети Осман вакътында бу Къуран чокъартылды ве чешит Ислям мемлекетлерине ёлланылды.

Бойлеликнен, Къуран-ы Керим Аллахтан Пейгъамберимизге вахий этильгени киби муафаза этильди, сакъланды. Ич бир денъишмеге огърамадан кунюмизге къадар келип етти. Къыяметке къадар да бу шекильде девам этеджек. Бугунь къолумызда олгъан Къуран, Пейгъамберимизнинъ кунюнде язылып эзберленген, Хазрети Эбу Бекир вакътында мусхаф алына кетирильген ве Хазрети Осман тарафындан чокъартылгъан Къурандыр.