1. Ашайджакъ ве ичеджеклеримиз хелял олмакъ керек.
Аллах Къуран-ы Керимде шойле буюрды: «Эй, иман эткенлер! Сизге берген рызкъларымыздан темиз (хелял) олгъанларындан ашанъыз, эгер сиз тек Аллахкъа къуллукъ этсенъиз, Онъа шукюр этинъиз».(Бакъара суреси, 172).
2. Аштан эвель ве сонъ эллерни ювмакъ.
Пейгъамберимиз -саллаллаху алейхи ве селлем- шойле буюрды:
«Ашнынъ берекети, аштан эвель ве аштан сонъ эллерни ювмада». Тирмизи.
3. Ашамагъа башлагъанда «Бисмиллях», тойгъандан сонъра да «Эльхамдулиллях» демек.
Пейгъамберимиз Хазрети Мухаммед -саллаллаху алейхи ве селлем- шойле буюрды: «Сизден бириси аш ашамагъа башлагъанда «Бисмиллях» десин. Эгер «Бисмиллях» демеге унуткъан олса, акълына кельгенде, «Бисмлляхи эввелеху ва ахираху» десин».Эбу Давуд.
4. Ашны ашагъанда озь огюнден ашамакъ ве сагъ элинен ашамакъ.
Пейгъамберимиз шойле буюрды: «Бисмиллях» де, сагъ элинънен аша ве огюнъде олгъан шейлерден аша».Бухари.
5. Локъманы агъызымызгъа сыгъаджакъ дереджеде алмакъ ве яхшы чийнегенден сонъ ютмакъ.
6. Локъма агъызда олгъанда лаф этмемек.
7. Бир парчаны даа ютмайып обирини алмамакъ.
8. Ашны сувутмакъ ичюн ашнынъ ичине уфлемемек.
9. Сув ичкенде бардакънынъ ичине нефес къайтармамакъ.
Пейгъамберимиз Хазрети Мухаммед -саллаллаху алейхи ве селлем- шойле буюрды: «Биринъиз сув ичкенде, сувгъа уфлемесин…» Бухари.
10. Сувны бир ютюмда ичмемек.
Пейгъамберимиз шойле буюра: «Сувны деве киби бир ютумда ичменъиз, эки я да уч ютумнен ичинъиз. Ичмеден эвель «Бисмиллях», ичкенден сонъ «Эльхамдулиллях» деп айтынъыз».Тирмизи.
11. Башкъаларыны игрендиреджек сёз ве арекетлер япмамакъ.
12. Ашны исраф этмемек, табакъкъа ашап оладжагъы къадар аш къоймакъ ве къойгъан ашыны битирмек;
Къуранда Аллах шойле буюра:
«… Ашанъыз, ичинъиз, факъат исраф этменъиз; чюнки, Аллах исраф эткенлерни севмез».Араф суреси, 31.
13. Джемаат алында ашагъанда эр кес ашап тоймадан софрадан турмамакъ.
14. Ашны ашамагъа буюклерден сонъ башламакъ.
15. Аякъта ашамамакъ.
Комментариев нет:
Отправить комментарий