АБДЕСТ НАСЫЛ АЛЫНА

 Башта бир, енълер тирсеклернинъ юкъарысына къадар къатлана. Мумкюн исе кыблагъа догъру отургъан алда абдест алмакъ яхшы. Сонъра «Ниет эттим Аллах ризасы ичюн абдест алмагъа» деп ниет этилир ве «Эузу билляхи минешшейтанир-раджим, бисмилляхиррахманиррахим» окъуныр.

Бундан сонъра сырасынен шулар япылыр:

- Эллер билеклерге къадар учь кере ювулыр, пармакъларда юзюк бар исе ойнатылыр ве юзюкнинъ астына сув кирмеси теминленир.

- Сагъ авучнен агъызгъа учь кере айры-айры сув алыныр ве эр кересинде яхшыджа чайкъаныр.

- Кене сагъ авучкъа сув толдурылып, бурунгъа сув чекилир ве сол эльнен темизленир. Бойле этип бурун учь кере айры-айры темизленир.

 - Бетнинъ эр тарафы учь кере ювулыр.

 - Къоллар тирсеклернен берабер учь кере ювулыр. Башта сагъ къол учь кере ювулыр, сонъра да сол къол учь кере ювулыр.

 - Бундан сонъра къоллар янъыдан сувнен сылатыла ве сагъ къолны ачып, яни авуч ичи ве пармакълар башнынъ устюне къоюлып баш месх этиле. Башкъа бир ифаденен сагъ къол сылатылып, башнынъ тёпеси бир кере сыйпала. Амма энъ азындан башнынъ ¼ ни бу шекильде сыйпамакъ керек. Эгер бунъа дикъкъат этильмесе абдест сайылмаз. Башны толусынен месх этмек исе даа да яхшы.

- Кене къолларны сылатып сагъ къолнынъ ишарет пармагъынен сагъ къулакънынъ ичи, баш пармагынен де къулакънынъ тышы: сол къолнынъ ишарет пармагъынен сол къулакънынъ ичи, баш пармагъынен де сол къулакънынъ тышы месх этилир, яни сюртюлир. Эллернинъ къалгъан учер пармагъынынъ тыш къысмынен де боюн энъседен башлап месх этилир.

 - Бундан сонъра эвеля сагъ аякъ, сонъра сол аякъ топукъларнен берабер учер кере ювулыр. Аякъларны ювгъанда, сагъ аякънынъ кичик (чинатий) пармагъындан башлап сыранен буюк пармакъкъа догъру ювмакъ, сол аякъны исе буюк пармагъындан башлап сыранен кичик пармакъкъа догъру ювмакъ яхшы олур. Аякълар ювулгъанда пармакъ араларынынъ яхшы темизленмесине дикъкъат этмек керек. Аякълар (эм сагъ, эм де сол аякъ) сол къолнен ювулыр.

 Энъ сонъунда аякъларымызны ювгъанымыз ичюн къолларымызны чайкъамакъ уйгъун олур.

Бойлеликнен абдест тамамлангъан олур. Къыблагъа тараф айланып Келиме-и Шехадет окъуныр.

Абдестнинъ фарз ве суннетлерине риает этип алынгъан эксиксиз бир абдест бойле олур.

Абдест алынгъанда окъунгъан дуалар бар. Буларнынъ окъунмасы гузель. Окъунмаса да абдест тамамлангъан сайылыр.