ПЕЙГЪАМБЕРЛИК ВЕ ПЕЙГЪАМБЕРЛЕРГЕ ОЛГЪАН ИХТИЯДЖ

Иманнынъ алты шартындан дёртюнджиси пейгъамберлерге инанмакътыр. Пейгъамберлик, Аллахнен инсанлар арасында бир эльчилик вазифесидир. Аллах бу вазифеге ляйыкъ олгъан энъ эйи къулларыны тайинлер. Пейгъамберлер ёл косьтериджи оларакъ ёлланылды. Инсанларнынъ бойле ёл косьтериджилерге ихтияджы бар.

 Чюнки инсанлар озь акъылларынен Аллахнынъ барлыгъыны анълап олсалар биле, Онынъ юксек сыфатларыны къаврап оламазлар. Аллахкъа насыл ибадет этиледжегини, Ахырет аятыны ве анда кимлерге мукяфат бериледжегини, кимлернинъ де джеза кореджегини, дюнья ве ахырет сеадети насыл къазаныладжагъыны билемезлер.

 Иште, бу акъикъатларны инсанларгъа огретмек, дюнья ве ахыретте бахтлы олманынъ ёлларыны косьтермек ичюн Юдже Аллах пейгъамберлерини вазифелендирген.