Пейгъамбер Эфендимиз Ислямгъа даветни учь йыл гизли япкъандан сонъра шу манадаки аетлернинъ назиль олмасынен, инсанларны ачыкътан Ислям динине чагъырув вакъты келе:
«(Эвель) энъ якъын акърабанъны тенбиеле. Муминлерден санъа уйгъанларгъа рахмет ве хидает къанатларынъны эндир. Эгер санъа къаршы кельселер, оларгъа де ки: -Мен сизинъ япкъанларынъыздан тамамен узагъым». (Шуара, 214-216).
«Санъа эмир олунгъанны ачыкъ сёйле ве мушриклерден юз чевир!»(Хиджр,94).
Бунынъ узерине Пейгъамберимиз -саллаллаху алейхи ве селлем-, башта якъынларыны эвинде топлап бир зияфет берди. Аллахтан алгъан эмирлерни теблигъ этип, оларны Ислям динине давет этти. Эмджеси Эбу Лехеб Пейгъамберимиз (с.в.а.)ге къаршы чыкъып, топлангъанларны дагъытты.
Бундан бир муддет сонъра Пейгъамберимиз -саллаллаху алейхи ве селлем- даветини кенишлетмек гъаесинен Сафа тёпесине чыкъты ве бутюн Мекке халкъъына сесленди. Онынъ сесини эшиткенлер этрафында топландылар.
Пейгъамберимиз -саллаллаху алейхи ве селлем- анда топлангъанларгъа:
- Сизге шу тёпенинъ артында бир душман ордусынынъ булунгъаныны хабер берсем, манъа инанырсынъызмы?- деп сорады.
Эписи бир агъыздан:
- Эбет инанырмыз. Чюнки сенинъ ялан сёйлегенинъни ич эшитмедик, - дедилер.
Бунынъ узерине Пейгъамберимиз -саллаллаху алейхи ве селлемоларгъа шойле деди:
- Ойле олса билинъиз ки, Аллах мени пейгъамбер оларакъ сечти. Манъа мелек васытасынен кенди келямыны бильдирди. Инсанларны хакъ дин олгъан Ислямгъа давет этмемни эмир этти. Аллах бирдир. Ондан башкъа танъры ёкътыр. Мен де сизге ве бутюн инсанларгъа ёлланылгъан Онынъ Пейгъамбери олам».
Анда олгъан Эбу Лехеб аякъкъа турып, Пейгъамберимиз (с.в.а.) ге къаршы джан агъыртыджы сёзлер айтты. Буныъ узерине топлангъанлар дагъылдылар. Бойледже, бу топлашувдан да ич бир нетидже чыкъмады.
Комментариев нет:
Отправить комментарий