Къадын-къоджа, ана-баба ве балалардан тешкиль олгъан энъ кучюк инсан джемиетине къоранта деп айтыла.
Къоранталарнынъ бирлешмелери нетиджесинде миллет мейдангъа келе. Бир миллет ичюн къорантанынъ эмиети пек буюк. Чюнки миллетнинъ темели – къоранта. Къоранталар бахтлы ве мабет олсалар миллет де кучьлю ве къуветли ола.
Къоранта – бир миллетни миллет япкъан миллий ве маневий шейлер, урф-адетлер огренильген бир мектептир. Аллахкъа, ветангъа ве миллетке нисбетен борджлу олгъанымыз вазифелер башта бу ерде огрениле. Кучюклер къорантада буюклернинъ арекетлерини корип такълит эте, даима бу арекетлер оларнынъ рухунда яхшы этип ерлеше ве алышкъанлыкъ алына келе. Бойлеликнен, баланынъ ахлякъий корюниши ортагъа чыкъа.
Инсанларнынъ арекетлерини бир фотоаппарат киби алгъан баланынъ темиз рухунда яхшы чизгилерни корьмек ичюн, къоранта азалары эр вакъыт гузель арекетлер япмалары керек. Бу себепнен, къоранта азаларынынъ бир-бирлерине нисбетен ахлякъий вазифелерини ве месулиетлерини ерине кетирмеси пек эмиетли. Къорантанынъ бахты ве миллетнинъ келеджеги бунъа багълы.
Къорантанынъ темели къадын ве къоджадыр. Къоранта эвеля буларнен къурула. Пейгъамберимиз -саллаллаху алейхи ве селлем шойле буюра:
«Дикъкъат этинъиз, сизинъ къадынларынъызынъ узеринде, къадынларынъызынъ да сизинъ узеринъизде хакълары бар…» (Тирмизи)
Комментариев нет:
Отправить комментарий