Къадын ве къоджанынъ бири-бирине нисбетен вазифелери

 Пейгъамберимиз -саллаллаху алейхи ве селлем-шойле буюрды: «Дюньяда манъа эки шей севдирильди: къадын, гузель къокъу, намаз да козюмнинъ нуру къылынды».Несаи.

 1. Эр шейден эвеля къадыннен къоджа арасында озьара севги олмакъ керек. Къуранда Аллах шойле буюра: «…Оларнен  (къадынларнен) яхшы кечининъиз...»Ниса суреси
2. Эр киши къорантасынынъ ашайджакъ, ичеджек ве башкъа ихтияджларыны ерине кетирмек ичюн чалышмалы, къазанчы хелял олмалы;

 3. Эр киши къорантасынынъ диний ве ахлякъий вазифелерини беджермесинде ярдымджы олмалы, бильмегенлерини огретмеге тырышмалы.

«Эпинъиз чобансынъыз; эпинъиз бакъкъан сюрюнъизден месулиетли оладжакъсынъыз. Девлет реиси де бир чобан ве сюрюсинден месулиетли. Эр киши къорантасынынъ чобаны ве сюрюсинден месулиетли. Къадын - къоджасынынъ эвининъ чобаны ве сюрюсинден месулиетли. Хызметчи - эфендисининъ малынынъ чобаны; о да сюрюсинден месулиетли. Нетидже оларакъ эпинъиз чобансынъыз ве бакъкъанынъыз сюрюден месулиетли оладжакъсынъыз».Бухари.

 4. Эр киши къадынына нисбетен назик ве юмшакъ муамеледе олмалы, къаба ве джан агъыртыджы олмамалы, Бу мевзуда Пейгъамберимиз -саллаллаху алейхи ве селлемшойле буюра: «Муминлернинъ иман джеэтинден энъ мукеммель олгъанлары, ахлякъы энъ гузель олгъанлар. Сизинъ энъ хайырлынъыз къадынларгъа нисбетен энъ яхшы муамеледе олгъанларынъыз». Тирмизи

 5. Къадын къоджасына севги ве урьметнен багъланмалы, эв идаресинде ве балаларынынъ тербиесинде къоджасына ярдымджы олмалы; 

6. Къадын икътисатлы олмалы, къоджасынынъ къазангъанларыны исраф этмемели ве эвине саип чыкъмалы; 

7. Кадын эвине, ювасына багълы олмалы, намусыны дикъкъатнен къорчаламалы; Пейгъамбер Эфендимиз -саллаллаху алейхи ве селлем- буюра ки: «Къадын беш вакъыт намазыны къылып, Рамазан оразасыны тутып, намусыны къорчаласа ве къоджасына итаат этсе, онъа: «Дженнетнинъ къайсы къапысындан истесенъ о къапыдан кир», - деп айтылыр».250 Хадис, с. 186

 «Бир къадын, къоджасы ондан разы олгъаны алда ольсе, дженнетке кирер». Тирмизи.