МУШРИКЛЕРНИНЪ МУСУЛЬМАНЛАРГЪА ЯПКЪАН ЗУЛУМЛАРЫ

 Мусульман олгъанларны динден къайтармакъ, Ислям нуруны сёндюрмек ичюн мушриклер мусульманларгъа эзиет эте, чешит зулум ве ишкенджелер япа эдилер.

 Ислямнынъ энъ буюк душманларындан Умейе бин Халеф, Билял Хабешини сыджакъ къумларгъа ятыртып, коксюне де ташлар къойып, саатларнен кунешнинъ астында туткъандан сонъра:

Эгер мусульманлыкътан вазгечмесенъ сени бу шекильде олдюреджекмиз, - дей. Бундан ич бир нетидже алып оламагъандан сонъра Билялнынъ бойнуна йип кечирип, Меккенинъ бир тарафындан башкъа тарафына сюйреклей. Бойле вахший ишкенджелер астында эзильмесине бакъмадан Хазрети Билял, «Аллах бир, Аллах бир» деп айта эди. Ниает, Хазрети Эбу Бекир, Билялны сатып алды ве залым Умейенинъ элинден къуртарды.

 Ильк мусульманлардан Аммар бин Ясир, сыджакъ къумларгъа ятыртыларакъ байылгъангъа къадар дёгюльди, анасы Сумейе, Эбу Джехиль тарафындан мызракънен ольдюрильди, бабасы Ясир де мушриклернинъ ишкенджелери нетиджесинде джан берди. Ясирнен къадыны Сумейе Хатун ильк Ислям шеитлери олдылар.

Даа Хаббаб бин Эрет, алевленип янгъан комюрлернинъ узерине яткъызыларакъ, Эбу Фукъайха исе аягъына багълангъан йипнен сыджакъ къумларнынъ узеринде сюйрекленерек инамындан себеп даянылмаз эзиетлер чеке эдилер. Булардан башкъа чокъ мусульман, мушриклернинъ зулумына огърагъан эди. Бунъа рагъмен керчек иман саиплери ишкенджелерден къоркъмадылар. Ислямдан вазгечмедилер.

 Хазрети Эбу Бекирнинъ Ислям огърунда япкъан буюк хызметлеринден бириси де мусульманлыкъны къабул эткени ичюн зулумгъа огърагъан бир чокъ къул ве джариени сатып аларакъ къуртармасы эди.