Мустакъиль окъув ичюн

Имамы Азам эбу Ханифе

Эбу Ханифе, Ислям дюньясынынъ етиштирген энъ буюк алимлеринден бирисидир. О, кениш бильгиси, зийреклиги ве юксек ахлякъынен Ислям дюньясында бир йылдыз киби парылдап, мусульманларны айдынлатты ве оларгъа ёл косьтерди. Эбу Ханифе буюк алим олмакънен бир сырада Аллахкъа ибадетте, инсанларгъа яхшылыкъ япувда, догърулыкъта ве гузель ахлякъта нумюне олгъан бир Ислям алимидир.

О, къыркъ йыл ятсы абдестинен саба намазыны къылды, яни геджелерни девамлы, юкъусыз ибадетнен кечирди. Намазнынъ бир рекятында Къуран-ы Керимни башындан сонъуна къадар окъуп чыкъкъаны бильдирильген. Эбу Ханифе Рамазан айында эр гедже бир кере ве куньдюз бир кере олмакъ узьре джеми 60 кере Къуран-ы Керимни хатим эте эди.

Къысметини тиджарет япып къазангъан Эбу Ханифе догърулыкътан ич айрылмаз ве озюнден чокъ башкъаларны тюшюне эди. Бир къадын, онъа сатмакъ ичюн йипек бир урба кетире. Эбу Ханифе фиятыны сорай. Къадын да юз дирхем истей.

Эбу Ханифе: - Бунынъ къыймети юзден фазладыр, къачкъа сатаджагъынъызны айтынъыз, - дей. Къадын юзер, юзер арттыраракъ 400 дирхемге къадар чыкъты. Эбу Ханифе:
 - Даа да пааллы, - дей:
 Къадын:
- Сен менимнен ойнайсынъмы шу?- деп ачувлана.
Эбу Ханифе:
- Янълыш анъладынъыз. Бир адам кетиринъ де, фият къойдурайыкъ, - дей. Къадын бир адам чагъыра ве сатаджакъ малына фият къоймасыны истей. Эбу Ханифе бу урбаны беш юз дирхемге сатып ала. О, озю муштери олгъанына бакъмадан, сатыджынынъ менфаатыны къорчалай. Бунынънен о, догърулыкъ ве акъикъатперверлик мисали ола.

Эбу Ханифе, элли беш кере хаджылыкъкъа барып келе. Сонъ кересинде Кябенинъ ичине кирип, эки рекят намаз къыла. Намазнынъ биринджи рекятында Къураннынъ ярысыны, экинджи рекятында да дигер ярысыны окъуй. Бойле этип, эки рекятлыкъ намазда Къуран-ы Керимни тамамлай.