Иманнынъ алты шартындан бириси Аллахкъа имандыр. Акъыллы ве пишкинлик чагъына еткен эр инсаннынъ биринджи вазифеси, Аллахнынъ барлыгъына ве бирлигине инанмакътыр.
Этрафымызгъа бакъкъанда, ич бир шейнинъ озь-озюнден мейдангъа кельмегенини корьмек мумкюн. Гузель бир бедиий эсер оны япкъан бир санаатчынынъ барлыгъыны косьтере. Меселя, къуллангъан саатымызны япкъан бир уста, одамызнынъ диварларында асылы тургъан дюльбер ресимлерни сызгъан бир рессам, отургъан бинамызны къургъан бир къуруджы ёкъмы? Эльбетте бар.
Ойле исе, мукеммель бир плангъа коре къурулгъан ве мукеммель бир низамнен чалышкъан кяинатнынъ, гузель санаат эсери олгъан инсаннынъ да бир яратыджысы бар. Иште, бу яратыджы, сонъсуз кучь ве къудрет саиби олгъан Аллахтыр. Кяинат - Аллахнынъ барлыгъыны; кяинаттаки аэнк ве мукеммель низам да Аллахнынъ бирлигини косьтермекте.
Бизлернинъ биринджи вазифемиз, бизни яраткъан ве яшаткъан Аллахкъа инанмакъ, Онъа гонъюльден багъланмакътыр. Аллахкъа догъру оларакъ инанмакъ ве Оны танымакъ ичюн Аллахнынъ сыфатларыны огренмек керекмиз.
Комментариев нет:
Отправить комментарий