Инсан, беден ве рухтан мейдангъа кельген бир варлыкътыр. Беденимизнинъ ашамагъа ве ичмеге ихтияджы олгъаны киби, рухумызнынъ да гъыдагъа ихтияджы бар.
Рухнынъ энъ эмиетли гъыдасы сагълам ве догъру имандыр. Аллахкъа инангъан ве ишангъан адам маневий гъыдасыны алгъан ве буюк къувет къазангъан олур. Чюнки адам эр вакъыт Аллахнынъ ярдымына мухтадж. Мухтадж олгъанымыз о Юдже Яратыджыгъа инанмакъ ве багъланмакъ сеадет ве инам менбаасыдыр.
Юдже Аллах шойле буюра:
«Дикъкъат этинъ, юреклер анджакъ Аллахны анъмакънен тынчланыр» (Рад суреси, 28).
Иман инсанны ялынъызлыкътан, маневий бошлукътан къуртара. Иман рухумызнынъ гъыдасы, къальбимизнинъ ышыгъыдыр. Имансыз бир инсаннынъ руху гъыдасыз, къальби къаранлыкъ ичинде къала. О, энъ буюк таянчтан махрум ола.
Яшайышта инсан чешит къыйынджылыкъларнен къаршылаша. Бойле вакъытларда юректен Аллахкъа багълы олгъан иман саиплери умютсизликке тюшмезлер. Аллахкъа сыгъынырлар. Онъа инанып, сабырнен нетиджени беклерлер. Бойле кучьлю бир досткъа севги ве сайгъынен багъланмакъ инсанны бахтияр япар.
Имандан махрум олгъан инсанлар умютсизликке тюшерлер. Бахтсыз олурлар. Къасеветлерден къуртулмакъ ичюн ички ве наркотик къулланмагъа чаре арарлар ве даа буюк белягъа огърарлар. Бойле этип эм дюнья, эм де ахырет сеадетини гъайып этерлер.
Комментариев нет:
Отправить комментарий