ИСЛЯМ ДИНИНИНЪ ХУСУСИЕТЛЕРИ

ИСЛЯМ ДИНИНИНЪ ХУСУСИЕТЛЕРИ

1. Ислям сонъ диндир. Ислямдан башкъа дин кельмейджек. Ислямнынъ укюмлери къыяметке къадар девам этеджек. Ислям динини инсанларгъа теблигъ эткен Хазрети Мухаммед -саллаллаху алейхи ве селлем- сонъ Пейгъамбердир. Ондан сонъра пейгъамбер кельмейджек.



2. Ислям бутюн кяинат динидир – бутюн дюнья динидир. Эвельки пейгъамберлернинъ теблигъ эткен динлер белли бир миллетлерге кельген эди. Албуки, Ислям дини бутюн дюнья миллетлерине ёлланылды, яни Ислям бутюн инсаниетке кельген бир диндир.

3. Ислям динининъ укюмлери бутюн инсанларнынъ ихтияджларыны къаршылайджакъ шекильде мукеммельдир. Бу себептен башкъа бир динге ихтиядж къалмай.

4. Ислям дини, ондан эвель ёлланылгъан Пейгъамберлерни ве китапларны тасдикъ эте.

5. Ислям дини эвельки пейгъамберлернинъ кетирген динлерни ве укюмлерни кечерсиз этти, чюнки олар белли бир миллетке ве белли бир вакъыт ичюн ёлланылгъан эди. Албуки, Ислям дини бутюн миллетлерге ёлланылгъан ве къыяметке къадар денъишмеден девам этеджек бир диндир