Аллахкъа, Пейгъамберге ве Къурангъа нисбетен вазифелеримиз

а. Аллахкъа нисбетен вазифелеримиз.

Бизни ёкътан бар эткен, мукеммель азаларнен донаткъан, дюньяда олгъан эр шейни бизим файдаланмамыз ичюн яраткъан Аллахтыр. Инсангъа берильген бу устюн хусусиетлер башкъа ич бир джанлыгъа берильмеген. Бу къадар яхшылыкъларгъа нисбетен япмамыз керек олгъан базы вазифелер бар.

Бу вазифелер:

1) Аллахнынъ бар олгъанына ве бир олгъанына инанмакъ.

2) Ибадет вазифелерини ерине кетирмек.

3) Эмирлерине коре арекет этип, ясакъларындан сакъынмакъ.

 4) Аллах севгисини эр шейден устюн тутмакъ.

5) Онынъ адыны сайгъынен анъмакъ. 6) Берген ниметлерге шукюр этмек.

 б. Пейгъамберге нисбетен вазифелеримиз 

Аллах, Ислям динини теблигъ этмек вазифесини Пейгъамберимиз Хазрети Мухаммед -саллаллаху алейхи ве селлем-ге берди. Севгили Пейгъамберимиз инсанлыкънынъ къуртулмасы ичюн чокъ тырышты. Бу ёлда пек чокъ къыйынджылыкъларнен къаршылашты. Ислямнынъ ышыгъынен дюньяны айдынлатты. Инсанларгъа бахтлы олмакънынъ ёлларыны косьтерди. Бу себепнен пейгъамберимизге нисбетен шу вазифелерни ерине кетирмек керекмиз:

1) Онынъ энъ сонъ ве энъ буюк пейгъамбер олгъанына инанмакъ;

2) Оны пек севмек, адыны эшиткенде саляват кетирмек;

3) Онынъ косьтерген ёлундан кетмек;

4) Онынъ гузель ахлякъындан нумюне алып яшамакъ.

Къуран-ы Керимде Аллах шойле буюра: «Эй, иман эткенлер! Аллахкъа итаат этинъ. Пейгъамберге ве сизден олгъан улульэмирге (идареджилерге) де итаат этинъ. Эгер бир хусуста анълашмазлыкъкъа тюшсенъиз - Аллахкъа ве ахыретке акъикъатен инансанъыз- оны Аллахкъа ве Ресульге алып барынъ (оларнынъ талиматына коре аль этинъ); бу, эм хайырлы, эм де нетидже нокъта-и назарындан даа гузель». Ниса суреси, 59. 

(Ресулим!) Де ки: Эгер Аллахны севсенъиз, манъа уюнъыз ки, Аллах да сизни севсин ве гуняхларынъызны багъышласын. Аллах пек багъышлайыджы ве мерхаметлидир. Али Имран суреси, 31.

в. Къурангъа нисбетен вазифелеримиз:

1) Къуран-ы Керимнинъ Аллах тарафындан пейгъамберимиз васытасынен бутюн инсанларгъа кельген сонъ китап олгъанына инанмакъ;

2) Оны къаиделерине коре гузель окъумакъ;

3) Манасыны анъламагъа тырышмакъ;

4) Къуранны окъугъанда ве динълегенде пек сайгъылы олмакъ;

5) Къураннынъ яп деп айткъаныны япмакъ , япма деп айткъанындан узакъ турмакъ .

Къуранда Аллах шойле буюра: «Шубесиз ки, бу Къур’ан энъ догъру ёлгъа ириштирир, яхшы арекетлерде булунгъан му’минлерге, озьлери ичюн буюк бир мукяфат олгъаныны мужделер». Исра суреси, 9.

 «Кене де ки: Хакъ кельди; батыл йыкъылды. Затен, батыл йыкъылмагъа махкюмдир. Биз Къур’андан ойле бир шей эндирмектемиз ки, О, му’минлер ичюн шифа ве рахметтир; залымларнынъ исе ялынъыз зияныны арттырыр». Исра суреси, 81-82.