ИЛЯХИЙ КИТАПЛАР ВЕ САИФЕЛЕР

 Иманнынъ алты шартындан учюнджиси – Аллахнынъ китапларына инанмакъ. Юдже Аллах, къулларына пейгъамберлер вастасынен китаплар ёллагъан. Бу китапларда, Аллахнынъ эмирлери ве ясакълары бильдирильген, къулларынынъ беджермелери керек олгъан вазифелер огретильген, дюнья ве ахыретте бахтлы олмакънынъ ёллары косьтерильген.

Биз мусульманлар, пейгъамберлерге ёлланылгъан бутюн китапларгъа инанамыз. Анджакъ, Къуран-ы Керимден гъайры дигер иляхий китапларнынъ сонърадан бозулгъаныны ве денъиштирильгенини де билемиз. Бу себептен биз оларнынъ шимдики бозулгъан шеклине дегиль де, пейгъамберлерге ёлланылгъан вакъыттаки, бозулмагъан (асыл) шеклине инанамыз. Кунюмизге бу шекильде келип чыкъмагъанлары себебинден ал-азырда гъайры динлернинъ къолунда олгъан «китаб-ы мукъаддесни» биз Аллахнынъ сёзю олгъаныны къабул этмеймиз. Къуран-ы Керим исе, пейгъамберимизге эндирильгени киби буюк федакярлыкънен сакъланып кунюмизге къадар кельген ве ич бир денъишмеге огърамагъандыр. Бойлеликнен, Аллахнынъ ирадеси Къурандадыр. Аллахнынъ разылыгъыны къазанмакъ истегенлер бильмели ки, Къуран инсанлыкънынъ уймасы керек олгъан тек иляхий китаптыр, яратыджынынъ сёзюдир.

Аллах тарафындан пейгъамберлерге ёлланылгъан китаплардан базылары бир къач саифеден мейдангъа кельген кучюк китаплардыр. Буларгъа китап дегиль де «сухуф» деп айтыла. Сухуф – саифелер демектир. Къалгъанларына «Дёрт буюк китап» дейилир.

Саифелер 

1. 10 саифе – Адем алейхисселямгъа.

 2. 50 саифе – Шит алейхисселямгъа.

3. 30 саифе – Идрис алейхисселямгъа.

 4. 10 саифе – Ибрахим алейхисселямгъа.

 Эписи олып 100 саифе.

Дёрт буюк китап

 1. Теврат – Муса алейхисселямгъа

2. Зебур – Давуд алейхисселямгъа

 3. Инджиль – Иса алейхисселямгъа

4. Къуран-ы Керим – бизим пейгъамберимиз, Хазрети Мухаммед алейхисселямгъа ёлланылгъандыр.