ИЛЬК ВАХИЙ (М.610)

Хазрети Мухаммед -саллаллаху алейхи ве селлем- 40 яшына кельгенде, онда базы денъишмелер олмагъа башлай. Янына ихтияджларыны алып Мекке якъынында ерлешкен Нур дагъындаки Хира магъарасына бара, бу ерде ялынъыз куньлердже къала, кяинатны яраткъан Аллахнынъ буюклигини тюшюне эди. Тюшюнде не корьсе корьгенлерининъ айнысы чыкъа эди. Кимсенинъ корьмеген ве бильмеген бир чокъ акъикъатларны ап-ачыкъ коре эди. Бу ал 6 ай къадар девам эте. Юдже Аллах оны тербие этип, пейгъамберликке азырлай эди.


Хазрети Мухаммед -саллаллаху алейхи ве селлем- милядий 610 сенесининъ Рамазан айында бир базарэртеси геджеси кене Нур дагъындаки Хира магъарасында, бутюн барлыгъынен Аллахкъа ёнельген эди . Бу сырада онъа Джебраиль -алейхисселям- корюнди ве:

 -Окъу, - деди.

Хазрети Мухаммед -саллаллаху алейхи ве селлем-:

 -Мен окъумагъа бильмейим, - деди.

Джебраиль -алейхи селям- экинджи кере

 - Окъу, - деди.

Хазрети Мухаммед -саллаллаху алейхи ве селлем-

 - Мен окъумагъа бильмейим, - деди.

Джебраиль -алейхи селям- учюнджи кере «Окъу» деп айткъандан сонъра, Хазрети Мухаммед -саллаллаху алейхи ве селлем-:

 - Не окъуйым?- деп сорады.

О вакъыт Джебраиль -алейхи селям- Къуран-ы Керимнинъ Алякъ суресининъ башында ер алгъан шу манадаки аетлерни бильдирди: «Яраткъан Раббинънинъ адынен окъу. О, инсанны «алякътан» яратты. Окъу, Раббинъ ниаетсиз керем саибидир. Къалемнен язмагъа огреткен Одыр. Инсангъа бильмегенини О огретти.»

 Бойледже, Хазрети Мухаммед -саллаллаху алейхи ве селлем-ге ильк вахий кельген, Къуран айетлери энмеге башлангъан эди. Бундан сонъра мелек кете. Окъунгъан аетлерни Пейгъамберимиз къальбине язылгъан киби окъумагъа башлай.

Ильк вахийнинъ агъырлыгъы, алгъан вазифенинъ буюклиги ве ис эткен месулиет дуйгъусынынъ тесиринен эвге къайта. Башындан кечкенлерни Хзрети Хатиджеге анълата. Хазрети Хатидже онъа теселли этип шойле дей:

«Муджделер олсун! Сабыр эт. Аятымны элинде булундыргъан Аллахкъа емин этерим ки, сен бу умметнинъ пейгъамбери оладжакъсынъ, Юдже Аллах сени асла къалдырмаз. Чюнки сен акърабалыкъ хакъларына риает этесинъ, сёзюнъде догърусынъ, къыйынджылыкъларгъа сабыр этесинъ, мусафирлерни яхшы къаршылайсынъ, фелякетке огърагъанларгъа ярдым этесинъ. Бойле олгъан къулуны Аллах ялынъыз къалдырмаз».