Динимиз айванларгъа нисбетен яхшы давранмакъны эмир эте. Айванларны къыйнамамакъ, оларгъа яхшы бакъмакъ ве мерхамет косьтермек ахлякъий бир вазифедир.
Бир мышыкъкъа мерхаметсизлик япкъан къадын акъкъында Пейгъамбер Эфендимиз -саллаллаху алейхи ве селлем- шу хаберни бере:
«Бир къадын олюнджеге къадар бир мышыкъны апс этип къапагъаны ичюн азап этильди ве джехеннемге кирди. Айванны апс эткени вакъыт онъа бр шей ашатмады, ичирмеди, ердеки боджеклерни ашамасына биле изин ве имкян бермеди».
Бир копекке мерхаметлик япкъан бир адам акъкъында да Пейгъамберимиз -саллаллаху алейхи ве селлем- шойле буюра: «Бир адам ёлда кетер экен пек сувсай. Бир къуюгъа расткеле. Къуюгъа тюшип сув иче. О сырада бир копек тилини чыкъарып сувсузлыкътан сылакъ топракъны ялай эди. «Бу копек де тыпкъы меним киби сувсагъан» дей ве аман къуюгъа тюше. Местине сув толдура (сув савуты олмагъаны ичюн) ве оны агъызынен тутып къуюдан чыкъа. Копекке сув ичирте. Бу иши ичюн Аллах ондан разы олды ве онынъ гуняхларыны багъышлады».
Сахабелер: - Я Ресулюллах; айванларда да бизим ичюн савап бармы? - деп сорайлар.
Пейгъамберимиз -саллаллаху алейхи ве селлем-: - Эр джанлы ичюн савап бар, - деп буюра. Бухари, Энбия, 54
Комментариев нет:
Отправить комментарий