УХУД ДЖЕНКИНИНЪ СЕБЕПЛЕРИ

Мушриклернинъ Бедир дженкинде магълюбиетке огърамалары меккелилер арасында буюк кедер догъура ве мушриклер матем тутмагъа башлайлар. Пегъамберимиз -саллаллаху алейхи ве селлем-ге энъ чокъ душманлыкъ япкъанлардан Эбу Лехеб бу кедернинъ тесири нетиджесинде оле.

Мушриклер, Бедирдеки агъыр магълюбиетнинъ интикъамыны алмакъ ичюн 3000 адамдан ибарет бир орду азырлайлар. Бедир дженкинде якъынлары ольдюрильген бир чокъ къадын да ордугъа къошула. Эбу Суфьян башчылыгъындаки бу орду, Меккеден арекет этип, Мединеге якъын бир месафеде булунгъан Ухуд дагъынынъ янында токътай.
Пейгъамберимиз -саллаллаху алейхи ве селлем-нинъ эмджеси Аббас, о вакъытта даа мусульман олмагъан ве Меккеде булуна эди. О, мушриклернинъ Мединеге уджюм этмеге азырлыкъ корьгенлерини бир мектюпнен гизли Пейгъамберимиз -саллаллаху алейхи ве селлемге бильдире. (Пейгъамберимиз -саллаллаху алейхи ве селлем-ни чокъ севген эмджеси Аббас сонъра Ислямны къабул эте.)