Инсанны ёкътан бар эткен, яшаткъан Аллах, инсаннынъ не къадар яшайджагъыны да такъдир эткендир. Омюр, инсаннынъ догъмасындан олюмине къадар кечкен сынъырлы вакъыттыр. Эджель - омюрнинъ, дюнья аятынынъ биткени вакъыттыр.
Эр кеснинъ не къадар яшайджагъы, не вакъыт, къайда ве насыл оледжегини Аллах такъдир эткен. Олюм себеплери не олса олсун, эджель бирдир, денъишмез. Эджель деп айтылгъан тайинленген вакъыт кельгенде инсан олюр. Эджельнинъ денъишмейджегини юдже Аллах Къуран-ы Керимде шойле бильдире:
«Артыкъ оларнынъ эджели кельгенде оны не бир саат кечке къалдыра билир, не де огге ала билирлер.» Нахль суреси, 61.
Бизим узеримизге тюшкен вазифе: Сагълыгъымызны сакъламакъ, аятымызны телюкеге атаджакъ шейлерден къорчаламакъ, сынъырлы дюнья аятында вакътымызны нафле кечирмемек. Ич ольмейджек киби дюнья ичюн, ярын оледжек киби ахырет ичюн чалышмакътыр.
Инсан, омюрининъ не вакъыт битеджегини, эджелининъ не вакъыт келеджегини билип оламагъанындан себеп вазифелерини вакъытында япмалы, келеджекке къалдырмамалы.
Комментариев нет:
Отправить комментарий