ТЕВЕККЮЛЬ

Тевеккуль – эр къайсы бир иш ичюн бутюн кучюмизнен чалышып, къолумыздан кельгенини япкъан сонъ нетиджени Аллахтан беклемектир.

Буны бир мисальнен анълатайыкъ:

 Тарласындан яхшы махсулат алмакъ истеген бир чифтчи, башта бир тарланы гузель этип сюрюр ве урлукъны сачар, кубресини атар, керек олса суварыр. Экинни зарарлы къуртлардан сакъламасы ичюн эр тюрлю тедбирни де алыр. Къалгъаныны исе Аллахкъа ташлар. Аллахкъа ишаныр. Чюнки чифтчи къолундан кельгенини япты. Артыкъ экинннинъ осьмеси ве махсул бермеси ичюн Аллахкъа ишанып, нетиджени Ондан беклемеси керек. Керчек тевеккюль бу.
Ёкъса ич чалышмадан бир ишнинъ олып чакъмасыны истемек ве нетиджени Аллахтан беклемек, тевеккюль дегиль. Бу мусульмангъа ярашмагъан янълыш бир тюшюндже.

Девесини тышарыда багъламайып ташлап кельген ве Аллахкъа тевеккюль эттим деген бир адамгъа Пейгъамберимиз -саллаллаху алейхи ве селлем- шойле деди: «Башта девени багъла, сонъра тевеккуль эт.» Кешфу’ль-Хафа, дж. 1, с. 144.

Пейгъамбер эфендимизнинъ бу мубарек сёзлеринден анълашыла ки, мусульман башта элинден кельгенини япаджакъ, сонъра Аллахкъа тевеккюль этеджек.

Намаз къылмакъ, ораза тутмакъ насыл диний вазифе исе, кечинмесини теминлемек ичюн чалышып къазанмакъ да ибадет къыйметинде олгъан бир вазифедир. Юдже Аллах:

«Намаз къылынгъанынен ер юзюне дагъылынъ ве Аллахнынъ фазлындан къысметинъизни къыдырынъыз», - деп буюрмакъта. Джума суреси, 10

Севгили пейгъамберимиз де хелял къазанч къыдырмакъ фарз олгъаныны бильдире.Кешфу’ль-Хафа, дж. 3, с. 46.
Хазрети Омер шойле дей: «Ич биринъиз рызкъыны къыдырмакътан вазгечип, Аллахым манъа рызкъ бер демесин! Сизлер билесинъиз ки, коклерден не алтын ягъар, не де кумюш.» Шерху Айни’ль-Илм, дж. 1, с. 182.

Корюльгени киби, чалышмакъ динимизнинъ эмири, мусульманнынъ вазифесидир. Бир ишни беджермек ичюн башта бир къолумыздан кельгенини япаджакъмыз, бутюн кучюмизнен чалышаджакъмыз. Сонъра бизни мувафакъиетке ириштирмесини Аллахтан беклейджекмиз, дуа этеджекмиз. Эр даим Аллахкъа инанаджакъмыз.