Мушриклер, аскер сайысы ве силя бакъымындан мусульманлардан чокъ устюн эдилер. Бу себептен, дженкте зафер къазанаджакъларына эмин эдилер. Олар мусульманларнынъ маневий кучюни эсапкъа алмагъан эдилер. Бу ерде хакъ иле батыл, иман иле куфюр чарпышаджакъ эди. Ислямнынъ келеджеги де бу дженкнинъ нетиджесине багълы эди.
Эртеси куню саба эки орду къаршы къаршыгъа келе ве дженк башлана. Иште, о вакъыт Пейгъамберимиз -саллаллаху алейхи ве селлем- эллерини котерип: "Я Рабби! Манъа ваде эткенинъ ярдымны бугунь бер" -деп дуа эте. Даа сонъра седжде япып Юдже Аллахкъа шойле ялвара: «Я Рабби! Бу бир авуч мусульман бугунь ёкъ олса, ер юзюнде санъа ибадет этеджек кимсе къалмайджакъ..!»
Аллах Тааля Пейгъмберимиз -саллаллаху алейхи ве селлем-нинъ дуасыны къабул этти.
Мусульманлар, иманларындан алгъанлары кучьнен къараманджа дженклештилер ве Аллахнынъ ярдымынен кендилеринден къат-къат устюн олгъан душман ордусыны буюк магълюбиетке огъраттылар. Душманлар дженк нетиджесинде 70 олю ве 70 эсир къалдырып, къачтылар. Ислямнынъ энъ буюк душманы Эбу Джехиль де ольгенлер арасында эди. Бойледже, дженк мусульманларнынъ мытлакъ заферинен екюнленген эди. Бу дженкте мусульманлардан 14 киши шехит олды.
Ислям аскерлери зафер севинчинен Мединеге къайталар. Пейгъамбер Эфендимиз -саллаллаху алейхи ве селлем- эсирлерге яхшы муамеле косьтерильмесини эмир эте. Эсирлернинъ бир къысмы фидье (белли микъдараки пара) берип, сербест ола. Бу микъдар параны тапып оламагъан ве окъума-язма бильген эсирлерден эр бири мусульманлардан он адамгъа окъума-язма огреткенден сонъра сербест ола. Пейгъамберимиз -саллаллаху алейхи ве селлем-нинъ бу арекети, Ислям динининъ окъума-язма ве бильги саиби олмагъа не къадар эмиет бергенини косьтере.
Комментариев нет:
Отправить комментарий