НАМАЗНЫНЪ СУННЕТЛЕРИ

1. Эр намазны башлагъанда алынгъан ильк текбирде, витир намазынынъ къунут текбиринде ве байрам намазларынынъ къошма текбирлери сырасында къолларны котермек. (Эркеклер, эллерининъ баш пармагъыны къулакъ йымшагъына тиеджек шекильде; Къдынлар исе пармакъ уджлары омузлары юксеклигине етеджек шекильде къолларыны котерирлер.)

 2. Беш вакъыт намазнен джума намазы ичюн эзан окъумакъ ве къамет кетирмек. Къадынлар ичюн эзан ве къамет окъумакъ суннет дегиль.

3. «Субханеке» дуасыны окъумакъ.

 4. Биринджи рекятта Субханекеден сонъра «Эузу-бисмиллях», дигер рекятларда Фатихадан эвель «Бисмиллях» окъумакъ.

5. Субханеке ве «Эузу-бисмиллях»ны сессиз окъумакъ.

6. Фатиха окъунгъан сонъ эм имамнынъ, эм де джемаатнынъ сессиз «Амин» демеси.

7. Ифтитах текбиринден гъайры намаз ичиндеки бутюн текбирлер.

8. Рукудан догърулгъанда «Семиаллаху лимен хамидех», бунынъ артындан да «Раббена лекель-хамд» демек.

 9. Рукуда учь кере «Субхане Раббиель-азым» ве седжделернинъ эр биринде учер кере «Субхане Раббиель-а’ля» демек.

10. Къыямда экен аякъларнынъ арасыны къарарнен дёрт пармакъ къадар ачыкъ тутмакъ. Инсанларны раатсыз этеджек къадар пек ачмамакъ.

11. Рукуда тизлерни эллеринен тутмакъ ве туткъанда эллернинъ пармакъларыны ачыкъ булундырмакъ. Къадынлар пармакъларыны ачмаз ве тизлерини тутмазлар, ялынъыз эллерини тизлерининъ устюне къоярлар.

12. Рукуда тизлерни ве тирсеклерни тюз тутып аркъасыны да букмеден тегиз япмакъ. Къадынлар исе тизлерини буккен алда ве аркъаларыны бираз юкъарыгъа мейилли булундырырлар.

13. Седждеге кеткенде ерге башта тизлерни, сонъра къолларны, даа сонъра юзюни (алнынен бурнуны) къоймакъ; седждеден тургъанда исе аксине, башта юзюни, сонъра къолларыны, даа сонъра тизлерининъ устюне къолларны къойып, тизлерини ерден айырмакъ, котермек.

14. Отурышларда эллерни улукълары узерине къоймакъ.

15. Отургъанда сол аягъыны ерге яйып устюне отурмакъ, сагъ аягъыны исе тик тутмакъ ве пармакъларыны огге къатлап къыбла тарафкъа бакътырмакъ. (Къадынлар аякъларыны сагъ тарафкъа берип янбашлары узерине отурырлар.)

16. Сонъ отурышта «Эттахиййату»дан сонъра «Аллахумме салли ве Аллахумме барик» нен «Раббена атина...ве Раббенагъфирли» дуаларыны окъумакъ.

17. Селям бергенде башыны башта сагъ тарафкъа сонъра да сол тарафкъа чевирмек.

18. Селям бергенде «Эссэляму алейкум ве рахметуллах» демек.