КЪАДЕР ВЕ КЪАЗАГЪА ИНАНМАКЪНЫНЪ ФАЙДАЛАРЫ

Къадерге инангъан инсан кяинатта эр шейнинъ Аллахнынъ такъдири ве яратмасынен мейдангъа кельгенини, анджакъ кендисине де бир сайлав сербестлиги ве япмакъ кучю берильгенини билир. Бу имангъа саип олгъан бир инсан, аятта зафер къазанмакъ ичюн бутюн кучюнен чалышыр, ич бир шейден къачмаз. Чюнки инсан, ирадесини ве кучюни бир ишни япмагъа ёнельтсе, о ишни Аллахнынъ яратаджагъына ве кене Аллах ярдымынен мувафакъиетке иришмесине инаныр.

 Инсан озь истегинен япкъан ишлерден месулиетли оладжагъыны бильгени ичюн сайламакъ сербестлигини яхшы ишлерде къулланыр. Джезаны талап эткен ишлерден сакъыныр. Бойлеликнен, къадер инамы, инсаннынъ эм чалышма кучюни, эм де месулиет дуйгъусыны арттырыр.

Къадерге инангъан бир инсан иши уймагъаны такъдирде я да бир фелякетнен къаршылашкъаны вакъыт умютсизликке къапылмаз, рухтан тюшмез. Чюнки Аллахнынъ эр ишинде бир икмет ве гъае олгъанына, инсаннынъ сынъырлы кучьке саип бир варлыкъ оларакъ яратылгъанына ишаныр. Кучюнинъ етмейджеги ишлерден месуль олмайджагъыны билир ве Аллахнынъ такъдирине бойсуныр, Онъа сыгъыныр. Бу инам инсангъа хошнутлыкъ берир, къасеветини ёкъ этер.

Къадер инамы бизге кяинатта эр шейнинъ бир плангъа коре ве бир гъаеге коре мейдангъа кетирильгенини, эр шейнинъ бир себеби олгъаныны огрете.

Бу иманнен инсан яшайышта мувафакъиетке иришмекнинъ ёлларыны ве себеплерини къыдырып тапып, озь къолундан кельген шейни беджермеге тырышыр.