Пейгъамберимиз -саллаллаху алейхи ве селлем-, мухаджирлернен Мединеге ерлешкенден сонъ да, меккели мушриклер душманлыкъларындан вазгечмедилер. Медине якъынларына къадар келип мусульманларнынъ девелерини алып кете эдилер. Мушриклер‚ мунафыкъларнынъ ёлбашчысы олгъан Абдуллах бин Убейге хабер ёллап, Мухаммед -саллаллаху алейхи ве селлем-ни ольдюрмесини я да Мединеден чыкъармасыны истейлер. Эгер буны япмаса, Мединеге уджюм этеджеклерини бильдирелер. Дигер тарафтан мусульманларнен япыладжакъ бир дженкке азырлыкъ ичюн буюк тиджарет керваныны Шамгъа ёллайлар.
Мусульманларнынъ бу телюкелерге къаршы уяныкъ олмасы ве тедбир алмасы керек эди. Керваннынъ арекетине мани олмакъ макъсадынен, хиджретнинъ экинджи йылы Рамазан айында Пейгъамбер Эфендимиз -саллаллаху алейхи ве селлем- 313 адамлыкъ бир орду иле ёлгъа чыкъа. Буны дуйгъан мушриклер, 950 адамлыкъ бир орду иле Мединеге уджюм этмек ичюн ёлгъа чыкъа. Мусульманлар Бедир дейильген ерге келип токътайлар ве бу ердеки сувны незарет алтына алалар.
Мусульманлар Мединеден дженклешмек ичюн дегиль, мушриклерге аит тиджарет керванынынъ арекетине мани олмакъ ичюн чыкъкъан эдилер.
Меккеден буюк бир душман ордусынынъ келеяткъаны акъкъында хабер алына. Бунынъ узерине Пейгъамберимиз -саллаллаху алейхи ве селлем- асхабы иле меслеатлашкъан сонъ душманнен къаршылашмагъа къарар берелер.
Пейгъамберимиз -саллаллаху алейхи ве селлем-, Ислям динини гузель сёзлернен ве иршад ёлунен яймагъа чалышты, ич бир вакъыт кимсени зорламагъан эди. Анджакъ, мушриклернинъ уджюмлерине къаршы Аллах тарафындан мусульманларнынъ дженк этмелерине изин берильген эди.
Комментариев нет:
Отправить комментарий