НАМАЗНЫНЪ ФАРЗЛАРЫ

 Намазнынъ фарзлары он экидир. Булардан алтысы намазнынъ тышында олып, оларгъа «намазнынъ шартлары» дейилир. Къалгъан алтысы да намазнынъ ичиндедир. Буларгъа да «намазнынъ рукюнлери» дейилир.

Намазнынъ сахих (кечерли) олувы ичюн он эки фарзнынъ эписи эксиксиз оларакъ ерине кетирильмели.

1. Намазнынъ шартлары: 

а. Хадестен* тахарет 

Хадес деп айтылгъан маневий кирни (абдестсизликни) кеттиртмек ичюн абдест алмакъ я да керекли алларда гъусуль япмакътыр.

б. Неджасеттен тахарет 

Намаз къыладжакъ кишининъ беденинде, узериндеки урбасында ве намаз къыладжагъы ерде пислик олса, буларны темизлемектир.

в. Сетр-и аврет 

Намаз къыладжакъ кишининъ вуджудыны ортмеси. Яни керекли олгъан ерлерни къапатмасы ве кийинген вазиетте намаз къылмасы.

Эркеклерде: Кобекнен тиз къапагъы арасыны (тиз къапагъы да ортюли олмалы).**

 Къадынларда: Юз, эль ве аякълардан гъайры (топукъларгъа къадар) вуджуднынъ эр тарафынынъ ортюли олмасыдыр. Къадынлар башы, сачы ве бойну ачыкъ вазиетте намаз къылсалар, намазлары къабул олмаз.

 г. Истикъбал-и къыбле

 Намазны къыбла тарафына бакъып къылмакъ. Къыбла, Мекке шеэринде булунгъан ве Аллахкъа ибадет макъсадынен япылгъан Кябедир. Ильк мукъаддес бина (яни Месджит) олгъан Кябе, Хазрети Ибрахим ве Хазрети Исмаил тарафындан къурулды.

д. Вакъыт 

Намазны озь вакътында къылмакътыр. Вакъты кельмеден бир намазны къылмакъ джаиз дегильдир.

е. Ниет 

Къайсы намазны къылгъанымызны бильмек ве къальбимизде хатырламакътыр. Ниетни тильнен сёйлемек суннеттир.

2. Намазнынъ рукюнлери: 

 а. Ифтитах текбири 

Намазгъа башлагъанда текбир алмакъ, яни Аллахны юджельткен бир сёз айтмакъ демектир.

 б. Къыям 

Намазда аякъта турмакъ демектир.

в. Къыраат

 Намазда аякъта экен бираз Къуран окъумакътыр.

г. Руку

 Намазда эллер тиз къапагъына етишеджек къадар эгильмектир.

д. Суджут 

Седжде япмакъ, яни аякълар, тизлер ве эллернен берабер алынны да ерге къойып седждеге къапанмакъ.

 е. Къаде-и ахыра 

Седждеден сонъ энъ аз «Эттахийяту» дуасыны окъуйджакъ къадар вакъыт отурмакъ демектир.

*Хадес – абдестсизлик алы

**Бу ортюльмеси керек олгъан минимум ерлердир.