Акъыллы бир къарт олюми якълашкъанда балаларыны янына чагъырып, бирер чубукъ алып кельмелерини истей. Балалар бабасынынъ эмрини ерине кетирелер. Къарт о чубукъларны топ этип багълай. Сонъра топ чубукъларны буюк огълуна узата ве оларны сындырмасыны истей. Огълу не къадар тырышса да бир арада олгъан чубукъларны сындырып оламай. Ихтияр баба чубукъларны сырасынен бутюн огъланларына бере, ама олар да сындырып оламайлар.
Бунынъ артындан чубукъларнынъ багъыны чезе. Чубукъларны айры-айры этип, эр огълунынъ элине бирер дане бере. Шимди эр кес элиндеки чубукъларны сындырсын дей, олар да сындыралар. Теджрибели баба бунынънен балаларына не демек истегенини шойле анълата:
«Эвлятларым! Чубукълар бир арагъа кельгенде сынмагъаны алда, бир-биринден айырылгъандан сонъ бирер - бирер насыл къолайлыкънен сындырылса; сиз де агъа- къардашлар оларакъ эр вакъыт бир ве берабер олсанъыз сизни ич бир кимсе енъип оламаз, раат ве бахтлы яшарсынъыз. Эгер парчаланып дагъылсанъыз, душманларынъыз сизни къолайлыкънен енъер ве бойлеликнен, перишан олурсынъыз. Бу мисальнен сизге даима бирлик ичинде олманъызны анълатмакъ истедим».
Вазиет бир къорантадаки къардашлар ичюн бойле олгъаны киби, даа да кениш манада ветан топракъларында яшагъан миллет ичюн де тыпкъы бунынъ кибидир.
Миллетимизни буюк къорантагъа бенъзетсек, миллетни мейдангъа кетирген инсанларымызны да, бу буюк къорантанынъ азалары ве бир-бирининъ къардашлары оларакъ тюшюнмек мумкюн.
Севгили Пейгъамберимиз: «Мусульман мусульманнынъ къардашыдыр» (Бухари) буюрып, бутюн мусульманларнынъ бир-бирининъ къардашы олгъаныны бильдире. Бу къардашлыкъ да ялынъыз дюнья аятында дегиль. Бу, олюмден сонъра да девам эткен ве бизни эбедий сеадет юрту олгъан дженнетте булуштыраджакъ бир къардашлыкътыр.
Бу, ойле бир къардашлыкъ ки, ич бир кучь оны парчалап оламаз. Ич бир кучь бизни бир-биримизден къопарып оламаз.
Комментариев нет:
Отправить комментарий