ИБАДЕТНИНЪ ФАЙДАЛАРЫ

Беденимизнинъ емекке ихтияджы олгъаны киби, рухумызнынъ да гъыдагъа ихтияджы бар. Рухнынъ гъыдасы - иман ве ибадетлердир. Ибадет рухумызны юкселтир, бизни феналыкълардан сакъындырыр, ахлякъымызны кямиллештирир ве энъ дегерли варлыгъымыз олгъан иманымызны къорчалар.

Омюр девамында инсан чешит къыйынджылыкъларнен къаршылаша. Атта умютсизликке тюшкен вакъытлары ола. Бойле вазиетлерде инсан ибадетлер ёлунен къуртулмасы мумкюн. Чюнки инсан ибадет вастасынен Аллахкъа якълаша. Онынъ рахметине сыгъына ве сеадетке къавуша. Ибадетлернинъ, рухумызгъа олгъаны киби беденемизге де чокъ файдасы бар.

Намаз къылгъан инсан абдест алмакъ меджбуриетиндедир. Абдест алмакъ, куньде бир къач сефер темизленмек демектир. Темизликнинъ исе сагълыгъымыз ичюн не къадар файдалы олгъаныны эпимиз билемиз. Инсан микроплардан къуртула ве аз хасталана. Даа сагълам омюр кечире.

Намаз къылгъанда япылгъан белли арекетлернинъ, ораза туткъанда азм системасы ве базы органларнынъ раатланмасынынъ вуджут сагълыгъына пек буюк файдалары бар. Зекят ибадетининъ исе ичтимаий ярдымлашма джеэтинден джемаат ичюн буюк файдасы бар.